काठमाडौँ । नेपालमा पछिल्लो २४ घन्टामा थप २५५ जनामा कोरोना पुष्टि भएको छ । देशभरका २५ वटा प्रयोगशालामा २४ घन्टामा ४६९६ जनाको नमुना परीक्षणका क्रममा २५५ जनामा संक्रमण पुष्टि भएको हो । 

 

स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा प्रवक्ता डा जागेश्वर गौतमले जानकारी दिए । यससँगै कोरोना संक्रमितको संख्या १६ हजार ४२३ पुगेको छ । 

 

पछिल्लो २४ घन्टामा काठमाडौँ उपत्यकामा २३ जनामा कोरोना संक्रमण पुष्टि भएको छ । स्वास्थ्य तथा जनसङ्ख्या मन्त्रालयले आयोजना गरेको प्रेस ब्रिफिङमा मन्त्रालयका प्रवक्ता प्राडा जागेश्वर गौतमले काठमाडौँका ६, पाटनका १० र ललितपुरका ७ गरी कुल २३ जनामा कोरोना सङ्क्रमण देखिएको जानकारी दिएका हुन् । 

 

जनस्वास्थ्य प्रयोगशाला टेकुमा गरिएको परीक्षणमा काठमाडौँका ६, पाटन स्वास्थ्य विज्ञान प्रतिष्ठानमा १० र त्रिवि शिक्षण अस्पताल महाराजगञ्जमा गरिएको परीक्षणमा ७ जनामा कोरोना सङ्क्रमण पुष्टि भएको हो । 

 

देशभरका ७७ जिल्लामा फैलिएको कोरोना संक्रमण पाँच जिल्लामा भने संक्रमण शून्य देखिएको छ । मन्त्रालयका प्रवक्ता गौतमका अनुसार धनकुटा, भोजपुर, सोलुखुम्बु, मुस्ताङ र हुम्लामा संक्रमण शून्य देखिएको हो । 

 

नेपालमा कोरोना संक्रमणका कारण हालसम्म ३५ जनाको मृत्यु भएको छ । डा गौतमका अनुसार मंगलबार २५३ जना कोभिड–१९ सङ्क्रमणबाट मुक्त भएका छन् । अहिलेसम्म ७७५२ जना सङ्क्रमणबाट मुक्त भएका छन् । अहिलेसम्म सङ्क्रमितमध्ये ४७.२ प्रतिशत बिरामी सङ्क्रमणबाट मुक्त भएका छन् । 

 

प्रवक्ता गौतमका अनुसार हालसम्म २ लाख ६६ हजार ४५७ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल २५ हजार ४० जना क्वारेन्टाइनमा र ८६३६ जना आइसोलेसनमा रहेका छन् ।