काठमाडौँ । नेपालमा पछिल्लो २४ घन्टामा थप २०४ जनामा कोरोना पुष्टि भएको छ । देशभरका २५ वटा प्रयोगशालामा २४ घन्टामा ६१३३ जनाको नमुना परीक्षणका क्रममा २०४ जनामा संक्रमण पुष्टि भएको हो ।
स्वास्थ्य तथा जनसंख्या मन्त्रालयले गरेको नियमित पत्रकार सम्मेलनमा प्रवक्ता डा जागेश्वर गौतमले जानकारी दिए । यससँगै कोरोना संक्रमितको संख्या १६ हजार १६८ पुगेको छ ।
पछिल्लो २४ घन्टामा काठमाडौँ उपत्यकामा २८ जनामा कोरोना संक्रमण पुष्टि भएको छ । स्वास्थ्य तथा जनसङ्ख्या मन्त्रालयले आयोजना गरेको प्रेस ब्रिफिङमा मन्त्रालयका प्रवक्ता प्राडा जागेश्वर गौतमले काठमाडौँमा १४, ललितपुरमा १० र भक्तपुरमा चार जनामा कोरोना सङ्क्रमण देखिएको जानकारी दिएका हुन् ।
जनस्वास्थ्य प्रयोगशाला टेकुमा गरिएको परीक्षणमा काठमाडौँका एक, पाटन स्वास्थ्य विज्ञान प्रतिष्ठानमा काठमाडौँका १२ र त्रिवि शिक्षण अस्पताल महाराजगञ्जमा गरिएको परीक्षणमा एक जनामा कोरोना सङ्क्रमण पुष्टि भएको हो ।
यस्तै, पाटन स्वास्थ्य विज्ञान प्रतिष्ठानमै गरिएको परीक्षणमा भक्तपुरका चार र ललितपुरका १० जनामा सङ्क्रमण देखिएको हो ।
मंगलबार सबैभन्दा बढी बाजुरामा ५४ जनामा कोरोना सङ्क्रमण देखिएको छ । अछाम र बैतडीका ११/११, महोत्तरीका नौ, धनुषा र अर्घाखाँचीका आठ/आठ, डोटीका सात, मोरङ र डडेल्धुराका छ/छ, सल्यान, रुकुम पश्चिम र नवलपसारीका पाँच/पाँच जनामा संक्रमण पुष्टि भएको छ ।
यस्तै, सप्तरी, सुनसरी, दाङ, सुर्खेत र गोरखाका तीन/तीन, तनहुँ, पाल्पा र बर्दियाका दुई/दुई, झापा, सिन्धुली, सिन्धुपाल्चोक, धादिङ, कास्की, लमजुङ, नुवाकोट, पर्सा, रामेछाप, रुपन्देही, सप्तरी, रुकुम पूर्व, बागलुङ र कपिलवस्तुका एक/एक जनामा कोरोना सङ्क्रमण पुष्टि भएको मन्त्रालयले जनाएको छ ।
नेपालमा कोरोना संक्रमणका कारण हालसम्म ३५ जनाको मृत्यु भएको छ । डा गौतमका अनुसार मंगलबार ६८८ जना कोभिड–१९ सङ्क्रमणबाट मुक्त भएका छन् । अहिलेसम्म ७४९९ जना सङ्क्रमणबाट मुक्त भएका छन् । अहिलेसम्म सङ्क्रमितमध्ये ४६.७ प्रतिशत बिरामी सङ्क्रमणबाट मुक्त भएका छन् ।
प्रवक्ता गौतमका अनुसार हालसम्म २ लाख ६१ हजार ८६१ जनाको पिसिआर विधिबाट परीक्षण गरिएको छ भने ३ लाख १२ हजार ४०२ जनाको आरडिटी विधिबाट परीक्षण गरिएको छ । उनका अनुसार हाल २५ हजार ७२७ जना क्वारेन्टाइनमा र ८६३४ जना आइसोलेसनमा रहेका छन् ।
प्रतिक्रिया