प्रवास

चार्टर्ड फ्लाइट मार्फत अमेरिकाबाट दुइसय ४६ नेपाली फर्किए

678 पटक पढिएको

25th Jun 2020, Thursday | २०७७ आषाढ ११, बिहीवार १७:५९
हिमालयखबर संबाददादा 
ड्यालस (टेक्सस) – कोरोना भाइरसका कारण नेपाल फर्किनबाट रोकिएका झण्डै अढाइसय नेपाली विहीबार कतार एअरको चार्टर्ड फ्लाइटबाट काठमाडौं उँडेका छन् ।
 
ड्यालसको ‘डिएफडब्लु अन्तर्राष्ट्रिय विमानस्थल’ बाट विहीबारको चार्टर्ड फ्लाइटमा नेपाल जानका लागि दुइसय ४६ जनाले टिकट लिएका थिए । अमेरिकामा आफन्त भेट्न आएर रोकिएका उनीहरुलाई नेपाल सरकारको पहल तथा वासिङ्गटन डिसीस्थित नेपाली राजदूतावास र एनआरएन अमेरिकाको समन्वयमा नेपाल पठाइएको हो । 
 
दुई दिन अघि टर्किस एअरलाइन्सबाट न्यूयोर्क हुँदै दुइसय ७७ जना नेपाल फर्किएका छन् । डिसीस्थित नेपाली दूतावासका इकोनमिक कन्सुलर होमकान्त भण्डारीका अनुसार विमानसेवा बन्द हुँदा अभरमा परेर रोकिएकाहरुलाई दुईवटा चार्टर्ड उडानबाट नेपाल पठाइसकिएको र अझै पनि आवेदन दिनेहरु बाँकी छन् । 
 
‘माग बढेमा अर्को चार्टर्ड उडान गरेर पठाउन सकिनेछ । तर अभरमा परेका धेरैजसो नेपालीहरु दुइ उडानबाट नेपाल फर्किनुभयो होला भन्ने हामीले अनुमान गरेका छौँ’ भण्डारीले भने । नेपाल जानका लागि दूतवासले सुरु गरेको अनलाइनमा एकहजार चारसयले आवेदन दिएका थिए । 
 
चार्टर्ड उडान मार्फत ड्यालसबाट नेपाल जानेका लागि एकहजार ६ सय डलर भाडा एअरलाइन्सले लिएको छ । कतिपय यात्रीले यो भाडा महंगो भएको गुनासो गर्दै नगएको अनुमान छ । केही साता अघि काठमाडौं स्थित अमेरिकी दूतावासको समन्वयमा नेपालबाट अमेरिका ल्याइएका यात्रुले जनही दुइहजार पाँचसय डलर भाडा तिरेका थिए ।
 
‘आज नेपाल फर्किन लाग्नुभएका धेरैको अनुहारमा खुशीयाली देखिन्थ्यो’ एनआरएन अमेरिकाका वरिष्ठ उपाध्यक्ष डा. अर्जुन बञ्जाडेले भने । बञ्जाडे यात्रुहरुलाई विदाई गर्न विमानस्थलमै पुगेका थिए । 
 
आज ड्यालसबाट उँड्नेमा अमेरिकाको पश्चिमी राज्य क्यालिफोर्नियादेखि लिएर कोलोराडो, ओक्लाहोमा लगायत मध्य र पश्चिमी भेगका राज्यमा आएका नेपालीहरु अधिक छन् । 
 
‘आठ महिना अघि दिदीलाई अमेरिका देखाउन बोलाएको थिएँ । दुई महिना अघिनै फर्किने टिकट थियो । भिसा पनि थप गरिसकेको थिएँ । तर अहिले चार्टर्ड उडानमा जाने इच्छा राख्नुएका कारण उहाँलाई पठाएँ’ नेपाली समाज टेक्ससका सदस्य युधिष्ठीर नेपालले भने ।  नेपालले रुपन्देही भलबारीकी दिदीलाई कोभिड १९ को परिक्षण गराएर नेगेटिभ देखिपछि पठाएका हुन् । 
 
परिक्षण गरेको प्रमाण लिएर जाँदा सरकारले तोकेको आइसोलेसन सेन्टरमा बस्नुपर्दैन । सिधै घर पुगेर क्वारेन्टाइनमा बसे हुन्छ । 
 
दूतावास र एनआरएनएले सिकागोबाट पनि चार्टर्ड उडान गर्ने तालिका सार्वजनिक गरेको थियो । तर प्रयाप्त यात्रु नहुँदा रद्ध भएको छ ।
 
महाबीरलाई स्वास्थ सामग्री पठाइयोः
यसैबीच ड्यालसका नेपालीमुलका स्वास्थकर्मीहरुले राष्ट्रिय आविष्कार केन्द्रका महाबीर पुनलाई झण्डै ५० पाउण्ड तौल बराबरको स्वास्थ सामाग्री पठाएका छन् ।
 
फोर्टवर्थमा बस्दै आएकी नेपालीमुलकी नर्स अञ्जु खरेल बञ्जाडेले पुनःको निस्वार्थ भावना र लगावलाई सहयोग गर्ने उद्देश्यले विहीबार फर्किन लागेका यात्रुहरु मार्फत ती सामग्री पठाइएको जानकारी दिइन् । सामग्रीमा कोभीड १९ र यसको उपचारमा संलग्नले प्रयोग गर्ने वस्तुहरू छन् ।