काबुल । अफगान मामिलाका लागि अमेरिकी विशेष प्रतिनिधि जाल्मे खलिलजादले अफगानी महान्यायाधीवक्ता कार्यालयका वकिलहरुको हत्याको भत्र्सना गर्दै उक्त हत्याकाण्डको छानबिन गर्न आग्रह गरेका छन् । ती वकिलहरु सोमबार गरिएको आतंकवादी आक्रमणमा मारिएका थिए । 

 

खलिलजादले अफगान कारागारबाट कैदीबन्दी मुक्त गर्ने कार्यमा कागजी प्रक्रियामा संलग्न रहेका महान्यायाधीवक्ता कार्यालयका वकिल र टोलीका अन्य सदस्यहरुको हत्या अत्यन्त अमानवीय रहेको बताउँदै अमेरिकी सरकारले उक्त हत्याकाण्डको भत्र्सना गरेको जानकारी दिए । 

 

उनले ट्वीट गर्दै भनेका छन्, “शान्तिका विरोधीहरुले उक्त आक्रमण गरी पाँच जनाको ज्यान लिएका छन् ।” अर्को ट्वीटमा उनले अगाडि भनेका छन्, “यस आक्रमणले एउटै कुरा स्थापित गर्न खोजेको छः देशी विदेशी दुवै तत्वले अफगानिस्तानमा अस्थिरता र शान्ति प्रक्रियामा ढिलाइ चाहेका छन् ।”

 

सोमबार भएको उक्त आक्रमणको कुनै पनि समूहले अहिलेसम्म जिम्मेवारी लिएका छैनन् । यसैबीच, उनले तालिबान र अफगान सरकार दुवैलाई अन्तर–अफगान वार्ताका लागि आवश्यक कदम चाल्न पुनः आह्वान गरेका छन् । 

 

विशेष प्रतिनिधि खलिलजादले वार्तामार्फत जतिसक्दो चाँडो विस्तृत शान्ति सम्झौता गर्न र राजनीतिक समाधान निकाल्न आग्रह गरेका छन् । उनले भनेका छन्, “यही नै अफगान जनताले चाहेका छन् र हामी उनीहरुको चाहनामा एकमत छौँ ।” एएनआई