जेनेभा । कोरोना भाइरसका कारण विश्वभर ३ लाख ३१ हजारभन्दा बढी व्यक्तिको मृत्यु भएको छ भने संक्रमितको संख्या ५१ लाख नाघेको छ ।  

 

जोन्स हप्किन्स विश्वविद्यालयका अनुसार नेपाली समयानुसार बिहीबार बेलुकीसम्ममा विश्वभर २४ घन्टाको अवधिमा एक लाख ४७४ जना नयाँ संक्रमित भेटिएका छन् । यसअघि अघिल्लो २४ घन्टामा विश्वमा ९४ हजार ८१३ जना नयाँ संक्रमित भेटिएका थिए । विगत २४ घन्टामा विश्वभर ४ हजार ६८५ जनाको ज्यान गएको छ । 

 

प्राप्त समाचारअनुसार विश्वभर ४५ हजार ६८८ जनाको स्वास्थ्य अवस्था कोरोना भाइरसबाट अत्यन्त जटिल रहेको छ भने २७ लाख ५० हजार ६१८ को स्वास्थ्य अवस्था सामान्य वा मध्यम छ ।  

 

युरोपेली मुलुकहरुमध्ये कोरोना भाइरसबाट बेलायतमा सबैभन्दा बढी व्यक्तिको मृत्यु भएको छ । पछिल्लो विवरणअनुसार बेलायतमा ३६ हजार ४२ जनाको कोरोना भाइरसका कारण मृत्यु भइसकेको छ । 

 

संयुक्तराज्य अमेरिकामा मृत्युदरमा उतारचढाव यथावत छ । पछिल्लो २४ घन्टामा अमेरिकामा एक हजार ४०३ व्यक्तिको मृत्यु भएको छ । योसहित अमेरिकामा मृत्यु भएका व्यक्तिको कूल संख्या ९५ हजार ५८ पुगेको छ ।

 

कोरोना भाइरसबाट सर्वाधिक मृत्युदर रहेका इटाली, स्पेन र फ्रान्स लगायतका मुलुकमा मृतकको संख्या ३० हजारको हाराहारीमा छ । हालसम्म इटालीमा ३२ हजार ३३०, फ्रान्समा २८ हजार १३२, स्पेनमा २७ हजार ८८८, बेल्जियममा ९ हजार १८६, जर्मनीमा ८ हजार २७१ र नेदरल्यान्ड्समा ५ हजार ७७५ जनाको मृत्यु भएको छ । 

 

दक्षिण अमेरिकी देशहरुमध्ये कोरोना भाइरसको इपिसेन्टरका रुपमा देखिएको ब्राजिलमा १९ हजार ३८ को मृत्यु भएको छ । इरानमा ७ हजार २४९, मेक्सिकोमा ६ हजार ९०, क्यानाडामा ६ हजार ३१, चीनमा ४ हजार ६३४ जनाको मृत्यु भइसकेको छ । 

 

विश्वभर ५१ लाख २५ हजार ५१२ जना संक्रमितमध्ये २० लाख ४४ हजार ४९ जना निको भएका छन् । यस्तै, ३ लाख ३० हजार ८४५ ले ज्यन गुमाएका छन् । युरोपमा संक्रमितको कुल संख्या १८ लाख ४६ हजार ४४ रहेकोमा ८ लाख २३ हजार १०६ जना निको भएका छन् भने ज्यान गुमाउनेको संख्या १ लाख ६६ हजार ८३८ पुगेको छ । 

 

यसैगरी, उत्तर अमेरिकामा कुल १७ लाख ७९ हजार ५८० जना संक्रमितमध्ये ४ लााख ६८ हजार ५८० जना निको भएका छन् भने १ लाख ८ हजार ३७० को मृत्यु भएको छ ।  

 

यस्तै, एसियामा कुल संक्रमितको संख्या ८ लाख ८० हजार २३८ पुगेको छ । यहाँ ५ लाख १० हजार ४१९ जना निको भइ घर फर्किएका छन् भने २६ हजार ७० जनाले ज्यान गुमाएका छन् । यसैगरी, दक्षिण अमेरिकामा कुल ५ लाख २१ हजार ३२१ जना संक्रमितमध्ये १ लाख ९३ हजार ९५१ निको भएका छन् भने २६ हजार ७७९ को ज्यान गएको छ ।

 

अफ्रिकामा कोरोना भाइरसबाट संक्रमित हुनेको संख्या ९८ हजार ९२० पुगेकोमा ३९ हजार ६१७ जना निको भएका छन् भने ३ हजार ५२ जनाको निधन भएको छ । यस्तै, ओसेनिया (अस्ट्रेलिया)मा कुल ८ हजार ६८८ बिरामीमध्ये ८ हजार २५ जना उपचारपश्चात् घर फर्किएका छन् भने जम्मा १२१ जनाले ज्यान गुमाएका छन् । 

 

दक्षिण एसियाली मुलुकहरुमध्ये सबैभन्दा प्रभावित भारत बनेको छ । भारतमा १ लाख १३ हजार ४७८ जना बिरामीमध्ये ४६ हजार २ जना निको भएका छन् भने ३ हजार ४६५ जनाको मृत्यु भएको छ । 

 

पाकिस्तानमा कुल ४८ हजार ९१ संक्रमितमध्ये १४ हजार १५५ जना निको भएका छन् भने १ हजार १७ जनाको ज्यान गएको छ । 

 

यस्तै, बंगलादेशमा २८ हजार ५११ संक्रमित भएकोमा ५ हजार ६०२ निको भएका छन् भने ४०८ को मृत्यु भएको छ । अफगानिस्तानमा कुल ८ हजार ६७६ जना संक्रमितमध्ये ९३८ जना निको भएका छन् भने १९३ को ज्यान गएको छ । यसैगरी, श्रीलंकामा संक्रमितको संख्या १ हजार ४५ पुगेको छ भने ६०४ जना निको हुनाका साथै ९ जनाको मृत्यु भएको छ । 

 

यसैगरी, माल्दिभ्समा १ हजार २१६ जनामा कोरोना भाइरस देखिएकोमा ९१ जना निको भएका छन् भने ४ जनाको ज्यान गएको छ । यस्तै, नेपालमा कुल संक्रमितको संख्या ४५३ पुगेको छ भने ४९ जना निको भई घर फकिएका छन् । नेपालमा बिहीबार एक शिक्षकको मृत्यु भएसँगै ३ जनाले ज्यान गुमाएका छन् । भुटानमा २१ जनामा संक्रमण देखिएकोमा ६ जना निको भएका छन् । भुटानमा अहिलेसम्म कसैको ज्यान गएको छैन । एएफपीको सहयोगमा