काठमाडौँ । विश्वव्यापी महामारीको रुपमा फैलिएको कोरोना भाइरसको संक्रमणबाट विश्वभर एकैदिन एक लाख बढी प्रभावित भएका छन् । यो हालसम्मकै उच्च संख्या भएको विश्व स्वास्थ्य संगठनले जनाएको छ ।
विश्व स्वास्थ्य संगठन (डब्ल्युएचओ) का महानिर्देशक टेड्रोस अधानम गेब्रेससले अहिलेसम्मकै सबैभन्दा बढी कोरोना संक्रमित फेला परेको जनाएका छन् ।
नयाँ संक्रमितमध्ये दुई तिहाइ संक्रमित अमेरिका, रुस, ब्राजिल र भारतका छन् । अमेरिकामा २२ हजार १८०, रुसमा ८ हजार ७६४ र ब्राजिलमा २१ हजार ४७२ जना संक्रमित थपिएका छन् । यस्तै, भारतमा ५५५३, पेरुमा ४५३७ र चिलीमा ४०३८ जना एकैदिन संक्रमित भएका छन् ।
डब्ल्युएचओले बुधबार अहिले नै कोरोना भाइरस अन्त्य हुने दिशातर्फ अघि बढिरहेको छ भनेर नबुझ्न पनि सुझाव दिएको छ । जेनेभामा बोल्दै गेब्रेयेसुसले विकसित मुलुक कोरोना भाइरस नियन्त्रणमा आएसँगै लकडाउन खुकुलो पार्ने दिशामा अघि बढिरहेको अवस्थामा गरिब मुलुकमा यो महामारी तीव्र गतिमा फैलिन सुरु गरेको बताएका छन् ।
उनले अझै पनि लामो यात्रा तय गर्न बाँकी रहेको बताउँदै निम्न र मध्यम आय भएका मुलुकमा यो भाइरसको महामारी फैलिनु चिन्ताको विषय रहेको बताए ।
अहिले दक्षिण अमेरिकी मुलुक ब्राजिलमा कोरोना भाइरसको महामारी तीव्र गतिमा फैलिरहेको छ । विश्वका धेरै मुलुकहरु कोरोना भाइरसको संक्रमण रोक्न नयाँ तरिका प्रयोग गर्ने विषयमा छलफल गरिरहेको अवस्थामा यस किसिमको समाचार सार्वजनिक भएको हो । बिबिसी
प्रतिक्रिया