राजनीति / समाज

सांसद् आचार्यद्वारा स्वास्थ्यकर्मीका लागि स्वास्थ्य सामग्री प्रदान

59 पटक पढिएको

हिमालयखबर संवाददाता | 9th Apr 2020, Thursday | २०७६ चैत्र २७, बिहीवार ०८:१५
रसुवा । रसुवा जिल्लाबाट निर्वाचित प्रतिनिधिसभाका सदस्य इन्जिनियर मोहन आचार्यले व्यक्तिगत तवरमा रसुवा जिल्लामा कोरोना भाइरस (कोभिड-१९) रोकथाम, नियन्त्रण तथा उपचारमा खटिने स्वास्थ्यकर्मीका लागि स्वास्थ्य सामग्री सहयोग गरेका छन् । 
 
जिल्लामा कोरोना नियन्त्रण अभियानमा खटिएका स्वास्थ्यकर्मी सुरक्षाकर्मीलाई स्वास्थ्य सामग्रीको अभाव हुन नदिन सांसद्ले विपद् व्यवस्थापन समितिलाई स्वास्थ्य सामग्री उपलब्ध गराए । 
 
जिल्ला विपद् कोषमा रहने गरी जिल्ला प्रशासन कार्यालय रसुवालाई उपलब्ध गराइएको सामग्रीमा ४० थान पिपिई सेट, ४० थान चस्मा, ४० थान बुट, ४०० थान केएन-९० माक्स र १५०० थान पन्जा रहेको छ ।
 
सांसद् आचार्यले प्रदान गरेको सामग्रीहरु आवश्यकताअनुसार जिल्लाका पाँचवटै स्थानीय तहमा पठाइने प्रमुख जिल्ला अधिकारी अर्जुन भण्डारीले बताए । 
 
स्थानीय तहमा कार्यरत स्वास्थ्यकर्मीले आफूहरुलाई सामग्री उपलब्ध गराउन माग गरिरहेको बताउँदै भण्डारीले यो सामग्रीले आफूहरुलाई धेरै सहज हुने बताए ।
 
यसअघि पनि सांसद् आचार्यले जिल्लालाई आवश्यक स्वास्थ्य सामग्री उपलब्ध गराएका थिए । सांसद आचार्यले जिल्लाका विपन्न परिवारलाई खाद्यान्नसमेत उपलब्ध गराउँदै आएका छन् ।