काठमाडौँ । नेपालमा थप तीन व्यक्तिमा कोरोना भाइरस (कोभिड–१९) को संक्रमण पुष्टि भएको छ । नेपालभित्र पहिलोपटक कोरोना भाइरस एक व्यक्तिबाट अर्को व्यक्तिमा सरेको पाइएको हो ।  

 

यसअघि कैलालीमा दुबईबाट फर्किएका एक पुरूषमा कोरोनाको संक्रमण देखिएको थियो । शनिबार उनकै भाउजू नाता पर्ने ३४ वर्षीया महिलामा पनि कोरोना भाइरस पुष्टि भएको छ । यससँगै नेपालमा कोरोना भाइरस संक्रमितको संख्या नौ पुगेको छ । 

 

नेपालमा पहिलोपटक एकबाट अर्को व्यक्तिमा कोरोना संक्रमण भएको पुष्टि भएको स्वास्थ्य तथा जनसंख्या मन्त्रालयले आफ्नो आधिकारिक फेसबुक पेजमार्फत जनाएको छ।

 

यसअघि युरोप र खाडीबाट आएका नेपालीमा मात्र कोरोना भाइरसको संक्रमण देखिएको थियो । 

 

शनिबार भारतबाट आएकाहरूमा पनि कोरोना भाइरस देखिएको छ । स्वास्थ्य मन्त्रालयका अनुसार भारतको मुम्बईबाट फर्किएका कैलालीका २१ वर्षीय पुरूष र उत्तराखण्डबाट फर्किएका कञ्चनपुरका अर्का ४१ वर्षीय पुरूषलाई पनि कोरोना भाइरस पुष्टि भएको छ।

 

योसँगै नेपालमा कोरोना भाइरस संक्रमितको संख्या ९ पुगेको छ। तीमध्ये एक जना निको भइसकेका छन् भने ८ जना उपचाररत छन् । जसमा दुई जनाको टेकु, दुई जनाको बाग्लुङ र एक जनाको धनगढीमा उपचार भइरहेको छ ।