अमेरिका – कोलोराडोमा एक जना नेपालीको कोरोना भाइरसका कारण अवस्था गम्भिरमात्र भएको खबर आएको छ ।*
कोलोराडो स्थित लङमण्टमा वस्दै आएका ७१ बर्षिय एक जना नेपाली जुन कोरोना भाइरस संक्रमण भएका थिए, उनको केही दिन देखि उपचार भईरहेको थियो । उनको स्वास्थ्य समस्याका बारेमा समाजिक संजाल र मिडियामा छलफलमा अझ नराम्रो खबर सार्वजनिक भएपनि अहिलेसम्म अवस्था क्रिटिकल तर, स्थिर रहेको वताईएको छ ।
नेपाली दूतावास वासिङटन डिसीको संयोजनमा विहीबार साँझ भएको कन्फरेन्स कलमा सहभागी एकले कोलोराडोवासी एकजनाको निधन भैसकेको जानकारी दिएका थिए । तर यसको स्वतन्त्र पुष्टी नभएको र ती व्यक्ति उपचारका क्रममा मात्र रहेको हिमालयखबर संवाददाताले पुष्टी गरेका छन् । उनलाई एक साता अघि लङमण्ट स्थित स्थानिय अस्पतालमा उपचारका लागि भर्ना गरिएको थियो । उनलाई अन्य स्वास्थ्य समस्या पनि रहेको थियो । परिवारले उनको नाम र अन्य विवरण सार्वजनिक गरेको छैन ।
वासिङटन डिसी स्थित नेपाली दुतावासलाई यसवारेमा जानकारी गराईएको छ । विहिवार दुतावासले संयोजन गरेको विभिन्न राज्यका नेपाली समुदायसंगको छलफलमा राजदुत डा. अर्जुनकुमार कार्कीलाई उक्त जानकारी गराईएको थियो ।
कोलोराडोमा अर्का दुई जनालाई पनि कोरोना संक्रमण भएको जानकारी आएको छ । जसमध्ये एक जनाको अस्पतालमा उपचार भईरहेको छ ।
कोलोराडोमा करिव १० हजार नेपाली वस्दै आएको अनुमान छ । विहिवार डेनभर लगायत कोलोराडोको विभिन्न स्थानमा हिमपात भएको छ । कोलोराडोमा करिव ४ हजार कोभिड१९वाट संक्रमित भएका छन् जसमध्ये ९७ जनाको मृत्यु भएको छ ।
अमेरिकामा कोभिड १९ को संक्रमितको संख्या बृद्धि भईरहेको छ । न्युयोर्क कोभिड १९ को मुख्य केन्द्र वनेको छ । त्यहाँ कोभिड १९ संक्रमित नेपालीको संख्या तीनसय भन्दा बढी पुगेको स्थानियहरुले अनुमान गरेका छन् ।
अमेरिकामा कोरोना भाइरस बृद्धि हुँदै गएकाले नेपाली विद्यार्थी, ऊबर, ट्याक्सी चलाउने, रेष्टुरेण्ट स्टोरमा काम गर्ने लगायतका समस्या बढ्दै गएको छ ।
क्यालिफोर्नियामा दुई जना परिवारलाई कोरोना भाइरस संक्रमण भएको खवर आएको छ । नेपालवाट आएका बुवा आमा लगायत परिवारका सदश्यलाई संक्रमण भएको वताईएको छ । अर्को एक जना ऊवर चलाउने नेपालीलाई पनि कोभिड १९ भएको त्यहांका स्थानियले जनाएका छन् । तर, संक्रमितले आफ्नो नाम सार्वजनिक गरेका छैनन् । ति परिवारले वाहिर सार्वज्निक गर्न अनुमति नदिएको महावाणिज्यदुत ऋषि ढकालले जानकारी दिए ।
टेक्सस लगायत नेपाली समुदाय वसोवास गर्ने अन्य क्षेत्रमा पनि कोराना संक्रमणको संख्या वढ्दै गएको छ । नेपालीभाषी केही भुटानीपनि कोराना संक्रमित भएको खबर आएका छन् ।
* यसअघि बैठकमा भएको छलफल र स्रोतको विश्वासका अाधारमा प्रकाशित समाचारमा उल्लेखित सन्दर्भप्रति हामी क्षमाप्रार्थी छाैँ ।
प्रतिक्रिया