काठमाडौँ । कोरोना भाइरस (कोभिड–१९) को संक्रमणबाट विश्वव्यापी प्रभावित भइरहँदा नेपालमा पनि एक जनामा संक्रमण पुष्टि भएको छ । स्वास्थ्य तथा जनसङ्ख्या मन्त्रालयले नेपालमा एक व्यक्तिलाई कोरोनाभाइरस सङ्क्रमण भएको पुष्टि गरेको हो । 

 

उनी फ्रान्सबाट कतार हुँदै नेपाल फर्किएकी एक विद्यार्थी भएको जानकारी मन्त्रालयले सोमबार आकस्मिक प्रेस सम्मेलनमार्फत् जानकारी गराएको हो । यद्यपि मन्त्रालयले प्रेस सम्मेलन गर्नुअघि नै विश्व स्वास्थ्य संगठन एवं समाचार एजेन्सीले नेपालमा दुई जनामा संक्रमण भएको विवरण देखाएको थियो ।

 

पीसीआर विधिबाट गरिएको परीक्षणमा तीमध्ये दुईवटामा कोरोना भाइरस भएको पुष्टि भएको हो । सङ्क्रमण भएको पुष्टि भएकी व्यक्ति १९ वर्षकी युवती भएको सरकारले जानकारी दिएको छ । 

 

युरोपमा महामारी फैलिएपछि उनी फ्रान्सबाट कतार हुँदै त्रिभुवन विमानस्थलमा उत्रिएकी हुन् । उनी नेपाल आएपश्चात् निवासकै क्वारेन्टाइनमा रहँदै आएको र सङ्क्रमण भएको पुष्टि भएपछि उनलाई छुट्टै राखेर उपचार भइरहेको बताइएको छ। उनको सम्पर्कमा आएका सबैलाई खोजेर क्वारेन्टाइनमा राख्ने प्रयास भइरहेको स्वास्थ्यमन्त्री भानुभक्त ढकालले जानकारी दिए । उनीसँगै विमानमा आएका अन्य यात्रीको पहिचान गर्ने प्रयास भइरहेको मन्त्री ढकालको भनाइ छ। 

 

केही साताअघि चीनको वुहानबाट फर्किएका एक नेपाली युवकलाई पनि सङ्क्रमण भएको पुष्टि भएको थियो । अहिले उनी स्वस्थ भइसकेका छन् । टेकुस्थित राष्ट्रिय जनस्वास्थ्य प्रयोगशाला अहिलेसम्म झन्डै ६०० वटा नमुनाको परीक्षण गरिएको मन्त्रालयका प्रवक्ता डा विकास देवकोटाले बताए । बीबीसी