चितवन । पूर्वी चितवनको रत्ननगर-७,सौराहाका १२ वर्षीय बालगायक प्रिन्स सिलवालको पाँचौँ प्रस्तुति ‘माया लाग्छ नेपालको’ भर्खरै सार्वजनिक भएको छ ।

 

आफूलाई जन्म दिने आमाबाबु र जन्मभूमि स्वर्गभन्दा प्यारो हुन्छ भन्ने सन्देशसहित बालगायक प्रिन्स सिलवालको देशप्रेमले ओतप्रोत भएको गीत ‘माया लाग्छ नेपालको’ आफ्नो युट्युबमार्फत् भर्खरै सार्वजनिक गरेका छन् । प्रिन्सका संगीत शिक्षक प्रेम घिमिरेको संगीत, दिनेश न्यौपानेको संयोजन तथा अनिल कटुवालको निर्देशनमा बनेको म्युजिक भिडियोमा सुन्दर पर्यटकीय नगरी पोखरा, सौराहा र काठमाडौँमा छायांकन गरिएको छ ।

 

बालगायक सिलवालको पहिलो एल्बम ‘दशैँ मनाउने’ दर्शक स्रोताले अत्यधिक मन पराएका थिए । पहिलो एल्बमबाटै चर्चा कमाएका उनले त्यसपछि न मानामा नापिन्छ माया, बाबा, देउसीभैलो गीत प्रस्तुत गरे ।

 

एकपछि अर्कोगरी आफ्नो प्रतिभा देखाएका उनले हालैमात्र ‘माया लाग्छ नेपालको’ गीत सार्वजनिक गरेका हुन् । म्युजिक भिडियोमा स्वर तथा मोडलिङ प्रिन्स र उनका संगीत शिक्षक प्रेम घिमिरेले गरेका छन् । सानैदेखि गीत(संगीतमा रुचि राख्ने प्रिन्सले कक्षा १ पढ्दादेखि नै आफ्नो प्रतिभा देखाउने गरेका उनका बुबा रमेश सिलवाल बताउँछन् ।

 

प्रिन्सको रुचि बुझेर बुबा रमेश र आमा प्रतिभा सिलवालले बालगायक बनाउन प्रोत्साहन दिँदै आएका छन् । प्रिन्सले पाँच कक्षामा पढ्दा पहिलो गीत रेकर्ड गराएका हुन् । प्रिन्सका बुबा होटल व्यवसायी हुन् भने आमा गृहणी हुन् । सौराहा स्थायी घर भएका प्रिन्स काठमाडौँस्थित चन्दवाग स्कुल बाँसवारीमा पढ्दैछन् ।

 

अभिनेता सरोज खनालसँगै अभिनय गरेका प्रिन्सले ‘बाबा’ बोलको गीत बुबाप्रतिको सम्मानमा गाएको बताएका छन् । सो गीतमा २०७२ सालको विनाशकारी महाभूकम्पले कैयौँ जनधनको क्षति गर्नुका साथै कयौँ नागरिकको सपना उजाड बनाएको विषयवस्तुमा केन्द्रित थियो ।

 

फरक धारको गीत ‘दशैँ मनाउने’मा बालगायिका दिप्ती भट्टले उनलाई साथ दिएकी थिइन् । रमेश पाठकको शब्द, संगीत र नरेन्द्र वियोगीको संयोजनमा बुद्ध लामाले निर्देशन गरेको उक्त गीतमा दीपेन्द्र भट्टले छायांकन र सम्पादन गरेका हुन् । सो गीतमा पनि प्रिन्स, दिप्ती र उनका साथीहरुले अभिनय गरेका थिए ।

 

प्रिन्सले ‘न मानामा नापिन्छ माया’ बोलको आधुनिक गीतमार्फत् सफल बालगायकको रुपमा आफूलाई उभ्याएका थिए । उनको एकल गायन रहेको सो गीतमा वसन्त बित्यासी थापाको शब्द, अशोक लुहारुङ राईको शब्द संगीत रहेको थियो ।

 

प्रिन्सका बुबा रमेश सिलवालका अनुसार प्रिन्सको छैठौँ गीत पनि छिट्टै सार्वजनिक हुँदैछ । उनले ट्राफिकसम्बन्धी सचेतनामूलक गीत ल्याउँदैछन् । गीत रेकर्ड भइसकेको छ भने छायांकन हुन बाँकी छ । ट्राफिक प्रहरीकै संयोजन र लगानीमा उक्त गीत आउन लागेको उनको भनाइ छ ।