न्यूयोर्क (अमेरिका) – प्रवासी नेपाली मञ्च र जनप्रगतिशील मञ्च अमेरिकाको एकीकरण पछि गठित प्रवासी नेपाली एकता मञ्चको बैठकले संस्थालाई विस्तार गरेको छ ।

 

शनिबार बसेको बैठकले प्रवासी नेपाली एकता मञ्च अमेरिकाको कार्यसमितिलाई विस्तार गरेर ५५ सदस्यीय बनाएको छ । मञ्चका अध्यक्ष प्रभु थापाको अध्यक्षतामा बसेको बैठकले सन् २०२० भित्रै संस्थाको अधिवेशन गर्ने निर्णय समेत गरेको छ ।

 

एकीकरणपछि गठित संस्थाको अध्यक्षमा प्रवासी मञ्चका पूर्ब अध्यक्ष प्रभु थापा (बाल्टिमोर) चयन भएका छन् भने सचिवमा जनप्रगतिशीलका तर्फबाट प्रकाश अधिकारी (डालस, टेक्सस) चयन भएका छन् । 

 

मञ्चले आउँदो मेमोरियल डे को सप्ताहन्त भौतिक बैठक बसेर सबै तयारी अघि बढाउने समेत निर्णय गरेको अध्यक्ष थापाले जनाएका छन् । गत महिना काठमाडौंस्थित नेकपाको केन्द्रिय कार्यालयले विश्वभरि रहेका आफ्ना भातृसंस्थाका रुपमा कार्यरत प्रवासी मञ्चको अध्यक्ष र सचिवको चयन गरेपछि अहिले अमेरिकामा विवाद बढेको छ ।

 

नेकपाद्वारा तोकिएका पदाधिकारी नमान्ने भन्दै एकपक्षले टेक गुरुङलाई अध्यक्ष घोषणा गरेको छ । शनिबारको बैठकबाट दुबै पक्ष लचिलो हुने आशा संस्थाका सदस्यहरुले राखेका थिए । तर दुबै पक्षले संस्था र पदमा दावी नछाडेपछि अब यो मुद्धा नेकपाको केन्द्रिय कार्यालयमा पुग्ने संकेत देखिएको छ ।