हेटौँडा । मकवानपुर जिल्लाको थाहा नगरपालिका–४ दामनस्थित एभरेष्ट पानोरमा रिसोर्टमा राति बास बसेका आठ जना भारतीय पर्यटकको मृत्यु भएको छ । मृत्यु हुनेमा चार महिला र चार पुरुष रहेका छन् ।
रिसोर्टको १०१ नम्बर कोठामा आठ जना मंगलबार बिहान बेहोस अवस्थामा भेटिएपछि रिसोर्टका कर्मचारीहरुले इलाका प्रहरी कार्यालय, पालुङलाई खबर गरेका थिए ।
आठै जना बेहोस अवस्थामा फेला परेको जानकारी पाउनासाथ मंगलबार बिहानै उद्धारगरी कैलाश एयरको हेलिकोप्टरमार्फत काठमाडौँको ह्याम्स अस्पताल पठाइएको पालुङका प्रहरी निरीक्षक विकास तामाङले बताए ।
मकवानपुरका प्रमुख जिल्ला अधिकारी नारायणप्रसाद भट्टका अनुसार सोमबार राति सो रिसोर्टमा बास बसेका १५ जनामध्ये अत्यधिक चिसोका कारण आठ जना एउटै कोठामा हिटर बालेर सुतेका थिए ।
नेपाल प्रहरीका सहप्रवक्ता एसएसपी उमेशराज जोशीका अनुसार ती पर्यटकहरु भारतको केरला राज्यबाट नेपाल घुम्न आएका हुन् । पोखरा भ्रमण गरी उनीहरु हेटौँडा आएका हुन् ।
अत्यधिक चिसो भएकाले कोठाको झ्याल, ढोका बन्द गरेर हिटर चलाएर सुतेका कारण अक्सिजन अभावले निसास्सिएर मृत्यु भएको प्रहरीको अनुमान छ ।
मृत्यु हुनेमा भारत केरलाका ३८ वर्षीय रन्जित कप, ३४ वर्षीय इन्द्र कप, ३७ वर्षीय प्रवीण, ३२ वर्षीया सरिया, ५ वर्षीय अभी, ७ वर्षीया अर्चना, ५ वर्षीय वैष्णव, ९ वर्षीया बन्द्रा रहेका छन् । उनीहरुको त्रिवि शिक्षण अस्पताल महाराजगञ्जमा पोस्ट मार्टमपश्चात् सनाखत भएको हो ।
प्रतिक्रिया