हिमालयखबर संबाददादा-
ड्यालस (अमेरिका) । टेक्ससका नेपालीहरुको सबैभन्दा पुरानो संस्था ‘नेपाली समाज टेक्सस’ को गत महिना चयन भएको नयाँ नेतृत्वले आइबारदेखि औपचारिक रुपमा पदभार ग्रहण गरेको छ ।
आइतबार अपरान्ह अर्भिङको पशुपतिनाथ तथा बुद्ध मन्दिरमा आयोजित कार्यक्रममा संस्थाका अध्यक्ष सुमन थापाले नवनिर्वाचित अध्यक्ष दिनेश शर्मालाई पद हस्तान्तरण गरे । त्यस्तै महासचिव भक्त भण्डारीले नयाँ महासचिव भानुभक्त खरेललाई र कोषाध्यक्ष अमित शर्माले नयाँ कोषाध्यक्ष मधुर खरेललाई जिम्मेवारी हस्तान्तरण गरेका थिए ।
ड्यालस फोर्टवर्थ क्षेत्रमा बस्ने गण्यमान्य नेपालीहरुको बाक्लो उपस्थिती कार्यक्रममा थियो । कार्यक्रममा नयाँ पदाधिकारीहरुलाई पदको शपथग्रहण पनि गराइएको थियो ।
कार्यक्रममा पदभार ग्रहण गर्दै नयाँ अध्यक्ष शर्माले आफ्नो दुई वर्षे कार्यकाल स्कुल, नेपाली समुदायलाई अंग्रेजी भाषा, संस्थाको सुदृढिकरणमा समर्पित गर्ने प्रतिवद्धता जनाए । सोही अवसरमा निवर्तमान अध्यक्ष सुमन थापाले दुई वर्षसम्म संस्थाको नेतृत्व गर्दा आएका उतारचढाव, भोगेका घटनाका बारेमा चर्चा गरेका थिए ।
कार्यक्रममा नेपाली समाज टेक्ससका पूर्ब अध्यक्ष तथा निर्वाचन समितिका सदस्य डा. प्रेम अधिकारीले सन् १९९८ मा स्थापना हुँदादेखिको सन्दर्भहरु उल्लेख गरेका थिए । त्यस्तै अर्का पूर्ब अध्यक्ष तथा निर्वाचन समितिका संयोजक बैकुण्ठ बिक्रम थापाले आपूmले समय दिन नसक्ने अवस्था आएमा पद ओगटेर नबस्न सुझाव दिए ।
दुइ साता अघि भएको निर्वाचनले शर्माको नेतृत्वमा नयाँ कार्यसमिति निर्विरोध निर्वाचित भएको हो । समाजको वरिष्ठ उपाध्यक्षमा राजेन्द्र बाग्ले, उपमहासचिवमा नारायणहरि खड्का, कोषाध्यक्ष मधुर खरेल र सहकोषाध्यक्षमा विवेक कँडेल चयन भएका छन् ।
यस्तै समाजको कार्यसमिति सदस्यहरुमा विकास उप्रेती, दिनेश न्यौपाने, पशुपति तिमिल्सना, किरण पौडेल, राजुप्रसाद नेपाल र युधिष्ठर नेपाल निर्विरोध निर्वाचित भएका छन् ।
तीन मनोनितः
यसैबीच संस्थाका बिभिन्न रिक्त तीन पदहरुमा आइतबारनै मनोनित गरेर कार्यसमितिलाई पूर्णता दिइएको छ । मनोनित हुनेहरुमा महासचिवमा भानुभक्त खरेल, आइटी कोअर्डिनेटरमा प्रयास बास्तोला र महिला कोअर्डिनेटरमा निर्मला राई छन् । तीनैजनालाई आइतबारनै शपथ ग्रहण गराइएको थियो ।
ड्यालस फोर्टवर्थमा झण्डै दुई दर्जनको हाराहारीमा नेपाली संघसंस्थाहरु छन् । तरपनि नेपाली समाज टेक्ससलाई निकै प्रतिष्ठित संस्थाको रुपमा लिइन्छ । नेपाली समाजकै अगुवाईमा थुप्रै संस्थाहरु खुलेर सकृय छन् ।
प्रतिक्रिया