ह्युस्टन (टेक्सास)। नेपालका चर्चित हाँस्यव्यंग कवि शैलेन्द्र सिम्खडाको बेजोड प्रस्तुतिका बीच यहाँका नेपालीहरुले हिजो साँझ भरपूर मनोरन्जन लिए ।

 

नेप्लिज एशोसिएसन अफ ह्युस्टनले स्थानीय काठमाण्डु करी एन्ड बारमा आयोजना गरेको Entertaining Night With Shailendra Simkhada कार्यक्रमलाई दर्शकहरुले फरक प्रस्तुतिको रुपमा लिएका थिए । नेपालको वर्तमान अवस्था, सामाजिक र राजनीतिक स्थिति , सिनेमा जगत र एनआरएन सबै पक्षमा देखिएका विकॢति र विसंगतिलाई सिम्खडाले आफ्नो एकल प्रस्तुति मार्फत प्रहार गरेका थिए ।

 

झन्डै एक घण्टा ३० मिनेटको उनको धाराप्रवाह व्यंग कहिले नेपाली राजनीतिको फोहोरी अवस्था ,कहिले नेताहरुको लाछी र नालायकीपन अनि कहिले पुरुष र महिलाका क्रियाकलापप्रति लक्षित थिए । सामाजिक र धार्मिक विसंगति विरुध्द उनले आफ्ना कविता मार्फत गतिलो प्रहार गरे ।

 

कार्यक्रममा सहभागी महिला श्रोताहरुले कवि शैलेन्द्रको खरो व्यंगमा अलिकति असजिलो अनुभव भएको गुनासो पनि गरे । महिलाहरुप्रति उनको व्यंग अलि बढी नै अस्वभाविक भएको गुनासो गर्नेहरु पनि देखिए । तर समग्रमा हिजोको कार्यक्रम अत्यन्त मनोरन्जनात्मक र उत्साहप्रद रहेको सहभागीहरुको प्रतिक्रिया रह्यो ।

 

चीसो मौसम र "विकडेज " भएपनि दर्शक श्रोताहरुको गहकिलो उपस्थिति कार्यक्रममा देखियो । कार्यक्रमको प्रारम्भमा नेप्लिज एशोसिएसन अफ ह्युस्टनका अध्यक्ष डा. विष्णु नेपालले अथिति कलाकार र दर्शकश्रोताहरुको स्वागत गरेका थिए । वरिष्ठ सिनेमा निर्देशक नारायण पुरीले कवि शैलेन्द्र सिम्खडाको बारेमा आफ्नो भनाई राख्दै आयोजक सबैप्रति आभार व्यक्त गरे ।

 

कार्यक्रमका सहभागीहरु काठमाण्डु करी एण्ड बारको स्वादिष्ट नेपाली परिकार र हाँस्यव्यंग कार्यक्रमको आनन्द लिन पाएकोमा आयोजकप्रति खुशी देखिन्थे ।