धरान । धरान उपमहानगरपालिकाको प्रमुख पदमा नेपाली कांग्रेसका तिलक राई विजयी भएका छन् । तिलक राईले २६ हजार ७०९ मत प्राप्त गरी विजयी भएका हुन् ।
सधैँ वामपन्थीले जित्ने धरानमा यसपटक राईले इतिहास रच्दै नेकपालाई धक्का लगाइदिएका छन् । धरान उपमहानगर वामपन्थीको किल्ला मानिँदै आएको छ । यसपटक कांग्रेसका तिलकले सो किल्ला भत्काइदिएका छन् ।
उनका निकटतम प्रतिद्वन्द्वी नेकपाका प्रकाश राईले २३ हजार ९१४ मत ल्याए । तिलक राईले नेकपाका प्रकाशलाई दुई हजार ७९५ मतान्तरले पराजित गरेका हुन् ।
विसं २०७४ को निर्वाचनमा एमालेका उम्मेदवार स्व तारा सुब्बासँग चार हजार मतान्तरले हारेका राईले यस उपनिर्वाचनमा बदलामा दुई हजार ७९५ मतान्तरमा विजयी भएका हुन् ।
विसं २०४७ पछिका हरेक निर्वाचनमा वामपन्थीहरुले जित्दै आएको धरानमा तिलक राईले नयाँ इतिहास रचेको कांग्रेसका नगर नेता प्रेम पराजुलीले बताए ।
जीतपछि राईले धरानलाई भ्रष्टाचारमुक्त सहर बनाउने र सबै जनताको सल्लाह–सुझावमा नगरको कामकारबाही अघि बढाउने प्रतिबद्धता व्यक्त गरेका छन् ।
२०७४ मंसिर १० गतेको चुनावीसभामा प्रमुख भएपछि कुनै सेवासुविधा नलिने घोषणा गरेर उनले धरानका जनताको सहानुभूतिसमेत पाएका थिए ।
राई २०४८ सालदेखि काँग्रेसमा आबद्ध रहँदै आएका छन् । पार्टीको नगरसचिव हुँदै १३औँ महाअधिवेशनपछि उनी धरान नगर सभापतिसमेत बनेका थिए ।
प्रतिक्रिया