राजनीति / समाज

भीमफेदी कारागारबाट कैदी फरार, गृहले बनायो छानबिन समिति

165 पटक पढिएको

17th Nov 2019, Sunday | २०७६ मंसिर १, आईतवार ०४:१५
हेटौँडा । मकवानपुरको भीमफेदी कारागारबाट कर्तव्य ज्यान मुद्दामा जन्मकैदको सजाय काटी रहेका एक कैदी फरार भएका छन् । 
 
कर्तव्य ज्यान मुद्दामा अदालतद्वारा दोषी ठहर भई जन्म कैदको सजाय काटी रहेका र पाँच वर्षसम्म जेल जीवन बिताइसकेका चितवन घर भएका ३० वर्षीय कुलदीपराज धामी फरार भएको कारागारका प्रमुख प्रकाश खनालले जानकारी दिए । 
 
कारागारलाई सुरक्षित राख्न र कैदीबन्दी नभागुन भन्नका लागि १२ फिटभन्दा अग्लो पर्खाल लगाएर काँडे तारसमेत कसेर मजबुद बनाइएको कारागार परिसरबाट बन्दी कसरी भागे भन्ने अनुसन्धान भइरहेको कार्यालय प्रमुख खनालले जानकारी दिए ।  
 
पर्खालको केही सानो भागमा तारहरु लत्रिएको देखिएकाले बन्दी धामी त्यहीँबाट भागेको हुन सक्ने अनुमान गरिएको छ । फरार धामीको व्यापक खोजी भइरहेको जनाइएको छ ।
 
भीमफेदी कारागारबाट शनिबार राति कर्तव्य ज्यान मुद्दामा जन्मकैदको सजाय काटिरहेका एक कैदी फरार भएपछि गृहमन्त्रालयले छानबिन समिति बनाएको छ । 
 
गृहमन्त्रालयले घटनाको छानबिन गर्न आइतबार साँझ मन्त्रालयका उपसचिव दीपक नेपालको संयोजकत्वमा छानबिन समिति गठन गरेको जनाएको छ । मन्त्रालयका प्रवक्ता केदारनाथ शर्माले भने ‘समितिले कारागारमै पुगेर आवश्यक छानबिन गरी प्रतिवेदन गृहमा पेश गरेपछि प्रतिवेदनको आधारमा कारबाही अघि बढ्छ ।’
 
शर्माका अनुसार छानबिन समिति गठनको निर्णय भएको छ भने सोमबार बिहान समितिका संयोजक नेपाललाई चिठ्ठी दिने तयारी गरिएको छ ।