पोखरा । बंगलादेशका राष्ट्रपति मोहम्मद अब्दुल हमिदको पोखरा भ्रमणले पोखराका पर्यटन व्यवसायीहरु उत्साहित बनेका छन् ।
भ्रमण वर्ष, २०२० को पूर्वसन्ध्यामा राष्ट्रपति मोहम्मदको भ्रमणलाई विशेषरूपमा लिइएको पर्यटन परिषद्का अध्यक्ष चिरञ्जीवी पोखरेलले बताए ।
नेपाली सेनाको विशेष हेलिकप्टरबाट पोखरा आउनुभएका राष्ट्रपति हमिदलाई पोखरा विमानस्थलमा गण्डकी प्रदेशप्रमुख अमिक शेरचनसहित प्रदेशका उच्चपदस्थ व्यक्तिबाट भव्य स्वागत गरिएको थियो ।
त्यसलगत्तै राष्ट्र बैंक चोकको सडक किनारबाट पोखरा पर्यटन परिषद्को नेतृत्वमा बसेका पर्यटन व्यवसायी, आमा समूह, टोल विकास संस्था लगायतले नेपालको झण्डा फहराएर पुष्पगुच्छासहित हमिदको भव्य स्वागत गरेका थिए । धर्मपत्नीका साथमा रहेका राष्ट्रपति हमिदले मुस्कानका साथ सबैलाई अभिवादन गरेका थिए ।
भ्रमण वर्षको पूर्वसन्ध्यामा अतिविशिष्ट पाहुनालाई पोखरामा स्वागत गर्न पाउँदा निकै खुसी लागेको परिषद् अध्यक्ष पोखरेलले बताए । उनले यसलाई पर्यटन क्षेत्रका लागि एउटा सकारात्मक सन्देश भएको प्रतिक्रिया दिए ।
महिला पर्यटन व्यवसायी मञ्चका अध्यक्ष जमुना पराजुलीले सुन्दर शहर पोखरामा राष्ट्रपति हमिदको भ्रमणले पोखरालाई अन्तर्राष्ट्रियरूपमा चिनाउन थप सहयोग पुग्ने बताए ।
नाट्टा गण्डकीका अध्यक्ष सन्तोष पोखरेलले राष्ट्रपति हमिदको भ्रमणले पर्यटन प्रवद्र्धनमा थप भूमिका निर्वाह गर्ने विश्वास व्यक्त गरे । उनले भने, “पर्यटनमा प्रचारप्रसारले विशेष भूमिका खेल्छ, हमिदको पोखरा भ्रमणले पोखरा र यसको सुन्दरतालाई विश्वमा चिनाउने एउटा अर्को अवसर सिर्जना गरेको छ ।”
राष्ट्रपति हमिदले आफ्नी धर्मपत्नीका साथ फेवातालमा आधाघन्टा जलविहार गरे । फेवाताल किनारस्थित फिष्टेल लजमा दिवाभोज गरेर उहाँ पोखरा आसपासका दृश्यावलोकनका लागि रुपाकोट रिसोर्ट प्रस्थान गरे । रुपाकोट गाउँपालिकाले उनको स्वागतमा झाँकीसहित सांस्कृतिक कार्यक्रम प्रस्तुत गरेको थियो । करिबब एक घन्टा रुपाकोट बसेर उनी पौने ५ बजे हेलिकप्टरबाट काठमाडौँ फर्किएका हुन् ।
पोखराको आतिथ्यताले राष्ट्रपति हमिद निकै प्रसन्न भएको प्रमुख जिल्ला अधिकारी रमेशकुमार केसीले जानकारी दिए । प्रजिअ केसीले भने, “सुन्दर सहरमा अतिविशिष्ट पाहुनालाई घुमाएर पठाउन पाउँदा हामीलाई निकै खुसी लागेको छ ।”
राष्ट्रपति हमिदले बिदाइका बेला निकै प्रसन्न मुद्रामा सबैलाई धन्यवाद दिएको प्रजिअ केसीले बताए ।
प्रतिक्रिया