अमेरिका । भारत सरकारले हालै सार्वजनिक गरेको नयाँ नक्सामा नेपालको कालापानी, लिपुलेक र लिम्पियाधुरालाई आफ्नो भूभागमा पारेकोमा विदेशमा बस्ने नेपाली समुदायले विरोध गरेको छ ।
गैरआवासीय नेपाली संघ (एनआरएनए)का अध्यक्ष कुमार पन्तले विज्ञप्तिमा यसप्रति एनआरएनएको गम्भीर ध्यानाकर्षण भएको भन्दै भारतको सरकारको यो कार्यबाट विश्वभर छरिएर रहेका नेपाली क्षुब्ध भएको उल्लेख गरेका छन् ।
पन्तले विज्ञप्तिमा मुलुकको सार्वभौमिकता र भौगोलिक अखण्डताजस्ता संवेदनशील विषयसँग सम्बन्धित यो मुद्दामा नेपाल सरकार, आम नेपाली नागरिक एवम् विदेशस्थित गैरआवासीय नेपाली समुदाय एकसाथ उभिनुपर्ने उल्लेख गरेका छन् ।
‘अन्तर्राष्ट्रिय सिमाना रक्षाको लागि नेपाल सरकारको साथमा उभिन हामी सम्पूर्ण विदेशमा रहेका नेपाली प्रतिबद्ध छौँ,’पन्तले विज्ञप्तिमा भनेका छन् ।
एनआरएनए अमेरिका क्षेत्र संयोजक राजन त्रिपाठीले पनि शुक्रबार विज्ञप्ति प्रकाशित गर्दै भारतको यो कदमको विरोध जनाएका छन् ।
उनले नेपालको राष्ट्रियता, राष्ट्रिय स्वाधिनता, अखण्डता र स्वतन्त्रता विषयमा छिमेकबाट भएको यो गलत हर्कत र कदम नेपालीका निम्ति किमार्थ स्वीकार्य छैन भनेका छन् ।
अमेरिका बस्ने नेपाली समुदायले समाजिक सञ्जालमार्फत पनि नेपालको सीमा मिच्ने कार्यको विरोध गरेका छन् ।
क्यालिफोर्नियामा वस्ने बासुदेव घिमिरेले भारतीय समान बहिष्कार गरौँ भन्दै समाजिक सञ्जालमा लेखेका छन् । उनले भोका छन्, ‘यही मौका हो सुखसुविधा बिर्सेर नेपाल भारत व्यापार घाटा कम गरौँ ।’
यसअघि भारतले नेपालमाथि अघोषित आर्थिक नाकाबन्दी गर्दा अमेरिकामा नेपालीहरु यसको विरोधमा सडकमा उत्रिएका थिए । यदि आवश्यक पर्यो भने अहिले पनि सडकमा आउन तयार रहेको यहाँका नेपालीहरुले बताएका छन् ।
प्रतिक्रिया