मनोरञ्जन

दुर्गेश थापाको ‘ह्याप्पी तिहार’ गीत प्रतिबन्ध, दुर्गेशले मागे माफी

186 पटक पढिएको

22nd Oct 2019, Tuesday | २०७६ कार्तिक ५, मंगलवार ०८:१५
काठमाडौँ । हामी पनि नाच्नुपर्छ बीचबीचमा बोलको तीज गीतमार्फत् लोकप्रियताको उचाइमा पुगेका दुर्गेश थापाको  ‘ह्याप्पी तिहार’ बोलको तिहारको गीतमाथि प्रतिबन्ध लगाइएको छ ।   
 
सरकारले थापाको ‘ह्याप्पी तिहार’ बोलको गीतमा खानपानलाई अतिरञ्जित गर्दै नेपालीको संस्कृतिलाई नै विकृत बनाउने गरी शब्दहरु प्रयोग गरिएकाले प्रतिबन्ध लगाई प्रसारण तत्काल बन्द गर्न निर्देशन दिएको छ ।
 
उक्त गीतमा कानूनबमोजिम नेपालमा प्रतिबन्धित लागूऔषध गाँजा सेवनलाई युवामा प्रोत्साहन हुने गरी संगीत भरेर दृश्य छायांकन गरी समाजमा गलत सन्देश फैलाउने कार्य गरेकाले प्रतिबन्ध लगाइएको हो ।
 
सञ्चार तथा सूचना प्रविधि मन्त्रालयले गृहमन्त्रालयको पत्रानुसार थापाले आफ्नो युट्यूब च्यानलमा सार्वजनिक गरेको उक्त गीतमाथि आमसञ्चारमाध्यममा प्रतिबन्ध लगाई प्रसारण तत्काल बन्द गर्न निर्देशन दिएको छ ।
 
यसैबीच, दुर्गेशले आफ्नो गीतको कारण प्रतिबन्धित गाँजा र मदिरा सेवन गर्न प्रेरित गर्दा सामाजिक सदभाव र सांस्कृतिक विचलन आएको प्रति माफी मागेका छन् ।
 
उनले प्रहरीको आग्रहपछि आफूले युट्युबबाट सो गीत हटाएको जानकारी गराउँदै आगामी दिनमा सामाजिक खलल पुग्ने किसिमका गीत, म्युजिक भिडियो प्रशारण नगर्ने प्रतिबद्धता जनाएका छन् । साथै, कसैले कपी गरेर सो गीत सार्वजनिक नगरिदिनसमेत आहवान् गरेका छन् ।