एनआरएन विशेष

एनआरएनएको अध्यक्षमा कुमार पन्त १४७ मतअन्तरले विजयी

711 पटक पढिएको

महासचिवमा शर्मा, सचिवमा गौरीराज जोशी र आरके शर्मा विजयी

हिमालयखबर संवाददाता | 18th Oct 2019, Friday | २०७६ कार्तिक १, शुक्रबार ००:००
काठमाडौँ । गैरआवासीय नेपाली संघ (एनआरएनए) को विश्वसम्मेलनमा नयाँ नेतृत्वका लागि भएको निर्वाचनमा कुमार पन्त विजयी भएका छन् ।
 
अध्यक्षका लागि पन्त र कुल आचार्यबीच प्रतिस्पर्धा भएकोमा पन्तले आचार्यलाई १४७ मतअन्तरले पराजीत गरेका हुन् । पन्तको पक्षमा १२१७ र आचार्यको पक्षमा १०७० मत खसेको थियो । 
 
उपाध्यक्षमा डा बद्री केसी (११६३), अर्जुनकुमार श्रेष्ठ (१०२६), मन केसी (९६१),  सोनाम लामा (८९८) र महिला उपाध्यक्षमा रवीना थापा (१२३२) विजयी भएका छन् । थापाकी प्रतिस्पर्धी सपिला राजभण्डारीले ८६३ मत प्राप्त गरेकी छन् । 
 
यस्तै, महासचिवमा हेमराज शर्मा विजयी भएका छन् । महासचिवमा शर्माले १२३९ मत ल्याउँदा प्रतिस्पर्धी जानकी गुरुङले १०५३ मत प्राप्त गरेकी छन् । 
 
सचिवमा गौरीराज जोशी (९१६) र आर के शर्मा (८६८) विजयी भएका छन् । यस्तै, कोषाध्यक्षमा महेशकुमार श्रेष्ठ (१६५३), सहकोषाध्यक्षमा लोकप्रसाद दाहाल (११८४) र भोमादेवी लिम्बू (७०२) विजयी बनेका छन् ।  यस्तै, युवा संयोजकमा हिमाल गुरुङ (७६८) विजयी  भए ।
 
गैरआवासीय नेपाली संघ (एनआरएनए) अमेरिकाज क्षेत्रको संयोजक (आरसी) पदमा राजन त्रिपाठी (१५४) र उपसंयोजक (डीआरसी) पदमा राम सी. पोखरेल (१५०) विजयी  भएका छन् । यस्तै, क्षेत्रीय महिला उपसंयोजकमा अमेरिकाकी उमा कार्की थापा (१४४) विजयी भएकी छन् । अमेरिकाजको क्षेत्रीय युवा संयोजकमा विमला सापकोटा निर्विरोध भएकी छन् ।  
 
यस्तै क्षेत्रीय संयोजक एसिया प्रशान्तमा गोविन्द श्रेष्ठ रोविन्द (२१७), क्षेत्रीय उपसंयोजक एसिया प्रशान्तमा खगेन्द्र न्यौपाने (१९८) र पारसमणि पोखरेल (१९५) विजयी बनेका छन् । एसिया प्रशान्तकै क्षेत्रीय महिला संयोजकमा अमृता थापा निर्विरोध निर्वाचित भएकी छन् भने एसिया क्षेत्रकै क्षेत्रीय युवा संयोजकमा पनि दीपकप्रसाद कँडेल निर्विरोध निर्वाचित भए ।
 
यसैगरी, मध्यपूर्वको क्षेत्रीय संयोजकमा प्रवीन गुरुङ निर्विरोध भए भने उपसंयोजकमा मनोजकुमार श्रेष्ठ र राजेन्द्र अर्याल निर्विरोध भए । क्षेत्रीय महिला संयोजकमा पनि मध्यपूर्वबाट सुमित्रादेवी पौडेल निर्विरोध भइन् भने युवा संयोजकमा राजु रेग्मी निर्विरोध चयन भए ।  
 
यसैगरी, ओसेनियाको क्षेत्रीय संयोजकमा नवीन कँडेल १०७ मतसहित विजयी बने । उनले प्रतिस्पर्धी हरि राम्जालीलाई ७ मतअन्तरले पराजित गरेका हुन् ।ओसेनियाको महिला संयोजकमा जानकी पौडेल र युवा संयोजकमा राजकुमार थपलिया निर्विरोध भए ।
 
युरोपको क्षेत्रीय संयोजकमा नारायणप्रसाद आचार्य २७४ मतसहित विजयी बने । उनका निकटतम प्रतिस्पर्धी सन्तोषकुमार भट्टराईले २७१ मत ल्याएका थिए । युरोपको क्षेत्रीय उपसंयोजकमा मुक्तबहादुर गुरुङ (३६९), कृष्णप्रसाद तिमिल्सिना (३५७), शुक्रराज न्यौपाने (२८३) मतसहित निर्वाचित भए । क्षेत्रीय महिला संयोजक (युरोप) कुमारी योगिता थापा, क्षेत्रीय युवा संयोजक (युरोप) जयकृष्ण ठाकुर निर्वाचित भएका छन् । 
 
ढिलोगरी सुरु भएको मतदानमा कूल २५ सय ७० प्रतिनिधिमध्ये २३ सय ४२ मत खसेको थियो । जसमा अमेरिकाबाट २६१, युरोपबाट ९२०, मध्यपूर्वबाट ४७०, ओनेसियाबाट २१४, एसियाबाट ४६० र अफ्रिकाबाट १६ मत खसेको थियो ।
 
जसमा पन्तको पक्षमा १२१७ र आचार्यको पक्षमा १०७० मत खसेको थियो । 
 
मत परिणाम सार्वजनिक भएसँगै नाचगान र बाजागाजासहित विजयी जुलुस भइरहेको छ । जुलुसमा पन्तका समर्थकले विजय जुलुस गरिरहेका छन् । 
 
बुधबार राति विवादका कारण बिहीबार बिहान १० बजेबाट मतदान सुरु भई साँझ ६ बजे सकिएको थियो । 
 
महाधिवेशनमा अध्यक्ष पदका लागि लोकतान्त्रिक खेमाबाट बेलायतमा बस्दै आएका कुल आचार्य र वामपन्थी खेमाबाट जर्मनीमा बस्दै आएका पन्तबीच रस्साकस्सी भएको थियो । 
 
बुधबार झण्डै ६ घन्टा मतदानका लागि प्रतिनिधिहरु लाइनमा बसिसकेपछि विद्युतीय भोटिङ्ग मेसिन बिग्रेको भन्दै मतदान रद्द गरिएको थियो । 
 
बिहीबार मतपत्रमार्फत् मतदान भएको थियो । महाधिवेशनमा विश्वका ८१ मुलुकबाट  २५ सय ७० प्रतिनिधि निर्वाचनमा सहभागी भए । 
 
एनआरएनएको विश्वसम्मेलन एवम् नवौँ अधिवेशनको उद्घाटन मंगलबार राष्ट्रपति विद्यादेवी भण्डारीले गरेकी हुन् । समापन कार्यक्रम बिहीबार प्रधानमन्त्री केपी शर्मा ओलीबाट हुने तय भए पनि मतदान रद्द भएका कारण कार्यक्रम पछाडि सरेको हो ।