एनआरएन विशेष

एनआरएनएको मतदान सकियो, २३ सय ४२ मत खस्यो

404 पटक पढिएको

कुनै दाबी विरोध नभएमा नौ बजेदेखि मतगणना सुरु हुने

हिमालयखबर संवाददाता | 17th Oct 2019, Thursday | २०७६ आस्विन ३०, बिहीवार ०६:१५
काठमाडौँ । गैरआवासीय नेपाली संघ (एनआरएनए) को विश्व सम्मेलनमा आज बिहान १० बजेदेखि सुरु भएको मतदान कार्यक्रम साँझ ६ बजे सकिएको छ । 
 
बुधबार भोटिङ्ग मेसिनले काम नगर्दा मतदान रद्द हुन पुगेको थियो । कूल २५ सय ७० प्रतिनिधिमध्ये २३ सय ४२ मत खसेको छ । जसमा अमेरिकाबाट २६१, युरोपबाट ९२०, मध्यपूर्वबाट ४७०, ओनेसियाबाट २१४, एसियाबाट ४६० र अफ्रिकाबाट १६ मत खसेको निर्वाचन समितिले जनाएको छ । 
 
सुरुवातमा केही विवाद देखिए पनि आजको चुनाव शान्तपूर्णरुपले सम्पन्न भएको हाम्रा प्रतिनिधिले जनाएका छन् ।
 
निर्वाचन तालिकाअनुसार आज एनआरएनए सम्मेलन समापन हुने भए पनि प्राविधिक त्रुटि, व्यवस्थापकीय कमजोरी र अतिशय विवादका कारण ढिलाइ भएको हो । 
 
निर्वाचन सचिवालयका अनुसार कुनै दाबी विरोध नभएमा नौ बजेदेखि मतगणना सुरु हुने र आज रातिसम्म नतिजा आउने बताइएको छ । 
 
नवौँ अधिवेशनमा आर्थिक प्रतिवेदन पास भएपछि मात्रै मतदान गर्नुपर्ने प्रावधान भए पनि यसपटक विवादका कारण प्रतिवेदन पास हुन सकेन ।
 
मतदान सकिएसँगै अध्यक्षमा कुल आचार्य र कुमार पन्तमा कसले जित्छन् भन्ने अडकलबाजी चल्न थालेको छ । चुनाव अत्यन्तै प्रतिस्पर्धात्मक भएकाले कसले बाजी मार्छ भनेर अनुमान गर्न नसकिने स्थिति छ ।