हिमालयखवर संवाददाता

अमेरिका- गैर आवासिय नेपाली संघ अन्तराष्ट्रिय समन्वय परिषद (एनआरएनए)को अध्यक्षका लागि उम्मेदवार दिन मनोनयन शुल्क मात्र १० लाख  रुपैंंया (१० हजार अमेरिकी डलर ) तोकिएको छ ।

 

यो उम्मेदवारको फिर्ता नहुने रकम हो ।

 

यो यस अघिको भन्दा झण्डै दोब्बर वढी हो । अध्यक्षपदमा २ जनाले उम्मेदवारी दिने घोषणा गरेका छन् । उपाध्यक्ष लगायत अन्य पदमा कयौं उम्मेदवारको दावी छ । अमेरिकावाट मात्र पदाधिकारीमा ५ जनाभन्दा वढीले उम्मेदवारी दिने घोषणा गरेका छन् ।

 

एनआरएनए नेतृत्वमा व्यवसायीक क्षेत्रका व्यक्तिहरुको सहभागिता वढी छ । निर्वाचन, भ्रमण, भेटघाट महंगो भएकाले पनि एनआरएनए नेतृत्वमा पुग्न निकै खर्चिलो छ । यही भएर एनआरएनएलाई धनीहरुको संस्था भन्ने आरोपपनि लागेको छ ।

 

एनआरएनएको नयां नेतृत्व चयन लगायत विभिन्न विषयमा छलफल गर्न अक्टोबरको मध्येमा काठमाडौ हायात होटलमा तीन दिने सम्मेलन हुदैं छ । त्यसवेला अध्यक्षपदका उम्मेदवारले मनोनयन गर्दा उक्त रकम तिर्नु पर्ने हुन्छ ।

 

अन्य पदका उम्मेदवारका लागि पनि मनोनयन रकम कम छैन । उपाध्यक्ष र महासचिवका लागि ६ लाख रुपैंया मनोनयन शुल्क तोकिएको छ  । सचिव र सह कोषाध्यक्ष हुन चाहनेले मनोनयनका लागि ५ लाख रुपैंया वुझाउनुपर्ने छ । सहकोषाध्यक्षकाक्षका लागि ४ लाख,महिला तथा युवा संयोजक, क्ष्ँेत्रिय संयोजकका लागि ३ लाख ५० हजार र यसमा उपसंयोजकहरुका लागि २ लाख ५० हजार रुपैंया मनोनयन शुल्क तोकिएको छ ।

 

निर्वाचनमा सहभागी हुन जाने प्रतिनिधिले २०० अमेरिकी डलर (करिव २० हजार रुपैंया) तिर्नु पर्ने छ । खाडी मुलुकवाट जाने प्रतिनिधिका लागि भने एक सय डलर तोकिएको छ ।