ड्यालस (अमेरिका) – गैर-आवासीय नेपाली संघ राष्ट्रिय समन्वय परिषद (एनआरएनए) अमेरिकाद्वारा स्थापित युथ लिडरसिप स्कलरसिप – २०१९ का बिजेताहरु घोषणा भएका छन् ।
बिजेताहरुमा दक्षिणी क्षेत्रबाट अमित त्रिपाठी (युनिभर्सिटी अफ साउदर्न मिसिसिपी), उत्तर–पूर्वबाट अस्का शेर्पा (हन्टर कलेज, न्युयोर्क), पश्चिमी क्षेत्रबाट किरण पाण्डे (आइडाहो स्टेट युनिभर्सिटी) र मध्य–पश्चिमबाट रिशिका जोशी (लोयोला युनिभर्सिटी, सिकागो) रहेका छन्। अमित जुनियर कन्स्ट्रक्सन इन्जिनियरिङ टेक्नोलोजी र अर्थशास्त्रका विद्यार्थी हुन् । यता अस्का शेर्पा सिनियर नर्सिङ विषय लिएर अध्ययनरत छिन् । किरण इलेक्ट्रिक इन्जिनियरका विद्यार्थी हुन् भने रिशिका बायोलोजी र न्युरो साइन्सका विद्यार्थी हुन् ।
एनआरएन अमेरिकाका निवर्तमान युवा संयोजक तथा युथ लिडरशिप अवार्ड २०१८ का परिकल्पनाकार स्वराज खातीले छात्रवृत्ति कार्यक्रम सफलतापूर्वक सम्पन्न गर्न सहयोग गर्ने समितिका सदस्यहरु द्वय- कुशल पोखरेल, डा.निरोज बस्नेत, डा. सिरोज पोखरेल, डा. सुमन सत्याल, सुमन कार्की, सुलभ पौडेल , निलिमा बादे श्रेष्ठ र प्रकाश बस्नेत लाई धन्यबाद दिएका छन् ।
नगद एक हजार डलर सहितको युथ लिडरशिप स्कलरसिप अमेरिकाको चारवटै भौगोलिक क्षेत्रबाट ३२ जना सहभागी भएका थिए। गैर-आवासीय नेपाली संघका महासचिब पशुपति पाण्डेले एक बिज्ञप्ति मार्फत बिजेताहरु सार्बजनिक गर्दै कार्यक्रम सफलतापूर्वक सम्पन्न गर्न सहयोग गर्ने समितिहरुलाई पनि धन्यबाद ज्ञापन गरेका छन् ।
युथ लिडरशिप अवार्ड २०१९ छनोटसमितिका सदस्य कुशल पोखरेलका अनुसार सबै सहभागीहरुलाई शैक्षिक, अतिरिक्त क्रियाकलाप, विभिन्न सिफारिस पत्रहरू, निबन्ध, समाजिक नेतृत्व र एनआरएन्एको लक्ष्यसँगको निकटताको आधारमा मुल्यांकन गरिएको थियो । निश्पक्षताका लागि शैक्षिक र नेतृत्व क्षमता भिन्ना भिन्नै समुहले मुल्यांकन गरेको थियो । पठाईएका निबन्ध चार जनाको समुहले छुट्टा छुट्टै जाँचेको थियो । अन्त्यमा सबैको अंकको औसत निकालेर विजेता घोषित गरियो ।
स्कलरसिप अवार्डको छनोट प्रक्रियामा लामो समय लागेता पनि छनोट समितीले पूर्ण समय लगाएर गहन विश्लेषण सहित उत्कृष्ठ नतिजा दिएकोमा संयोजक खातीले खुसी प्रकट गरे ।
उनले भने-"यो कार्यक्रमले क्षमतावान बिद्यार्थीहरुको नेतृत्व विकासमा टेवा पुर्याउने साथ-साथै एक किसिमको उर्जा प्रदान गर्ने मेरो बिश्वाश छ। यस कार्यक्रमले अमेरिका भरी छरिएर रहेर अध्ययनरत नेपाली बिद्यार्थीहरु र गैर-आवासीय नेपाली संघ बिचको सम्बन्ध अझै नजिक बनाएको छ ।"
संयोजक खातीले नया नेतृत्वले यस कार्यक्रमको महत्व बुझेर यसलाई प्राथमिकताका साथ निरन्तरता दिनेमा आफु आशाबादी रहेको पनि जानकारी दिए।
प्रतिक्रिया