राजनीति / समाज

विषादी प्रकरणमा झुक्याइयो, लज्जित छु : प्रधानमन्त्री ओली

58 पटक पढिएको

11th Jul 2019, Thursday | २०७६ आषाढ २६, बिहीवार ०१:०५
काठमाडौं । प्रधानमन्त्री केपी शर्मा ओलीले उनले आयातीत तरकारी र फलफूलका विषादि जाँचका सम्बन्धमा भारतीय दूतावासबाट आएको पत्रबारे आफूलाई जानकारी नदिइएका विषयमा खोजी गरिने बताए । सङ्घीय मामिला तथा सामान्य प्रशासन मन्त्रालयले आज यहाँ आयोजना गरेको ‘संविधान कार्यान्वयन र प्रशासनिक पुनः संरचना’ विषयको राष्ट्रिय कार्यशालाको उद्घाटन गर्दै उनले नेपालीको भान्सा शुद्ध र खानेकुरा विषादिरहित हुनुपर्ने उद्देश्यले सरकारले जाँच शुरु गरेको र यो कसैका विरुद्ध नभई नेपालीको खानेकुराका बारेमा मात्र भएको स्पष्ट गरे ।  
 
विषादी प्रकरणमा आफू लज्जित हुनुपरेको प्रधानमन्त्रीले बताए । भारतबाट आएको पत्रको सम्बन्धमा आफूलाई पनि झुक्याएको उनले दाबी गरे । सुरुवातमा आफूलाई दूतावासबाट पत्र आएको छ भन्ने जानकारी नै भएको बताए ।
‘पत्र आएको रहेछ तर मलाई जानकारी दिइएन, यसबाट म लज्जित भएको छु, क्षमायाचना गर्छु,’ उनले भने ।
 
स्वच्छ, प्रभावकारी, पारदर्शी र सेवामुखी प्रशासन बनाइने बताउँदै उनले भने, “जनतालाई आत्मविश्वास जगाउँदै भविष्यप्रतिको आशावादिता देखाएर प्रशासन क्षेत्रले छिटोछरितो रुपमा काम गर्नुपर्छ ।” 
 
उनले प्रशासनले एकातिर विकासका काम अगाडि बढाउनुपर्ने र  अर्कासतर जनतामा सेवा उपलब्ध गराउनुपर्नेमा जोड दिए ।   
 
अहिले सङ्घ र प्रदेशका बीचमा केही विवाद देखिएको जस्तो लागेको  बताउँदै उनले भने, ‘कतिपयले प्रदेश भनेको छुट्टै स्वतन्त्र सार्वभौम राज्य भनेर पनि कुरा गरेका छन् । कतिपयले प्रदेश एउटा एकाइ र निकाय मात्र भएको जस्तो कुरा गर्छन् । यी दुई कुरा यथार्थ होइन ।  प्रदेश स्वतन्त्र राष्ट्रको एउटा निकाय हो जसलाई नियन्त्रण गर्ने काम सङ्घीय सरकारको हो ।’
 
उनले सुरक्षा, अन्तरराष्ट्रिय मामिला र  आर्थिक स्रोत साधनका विषय सङ्घअन्तर्गत हुने व्यवस्था रहेको स्पष्ट गरे । रासस