खेलकुद

महानगरको आग्रहपछि धुर्मस–सुन्तली फाउण्डेसनले क्रिकेट रंगशालाको काम थाल्ने

88 पटक पढिएको

10th Jul 2019, Wednesday | २०७६ आषाढ २५, बुधवार ०४:१५
चितवन । धुर्मस–सुन्तली फाउण्डेसनले चितवनमा अन्तर्राष्ट्रिय क्रिकेट रंगशाला निर्माणको काम यथाशक्य छिटो अघि बढाउने जनाएको छ । 
 
फाउण्डेसनका अध्यक्ष सीताराम कट्टेल ‘धुर्मस’ले रंगशाला बनाउने योजनामा फाउण्डेसन विचलित नभएको बताए । फाउण्डेसनले रामपुरमा बन्द रहेको साइट कार्यालय खोल्ने र शिलान्यास अघि गर्नुपर्ने बाँकी कामहरु पूरा गर्ने जनाएको छ । 
 
डीपीआरको काम भइरहेको र आगामी भदौभित्र रंगशालाको शिलान्यास गर्ने तयारी भइरहेको धुर्मसले बताए । उनले अझै रंगशाला निर्माणका लागि उपयुक्त वातावरण बनाइदिन जिल्लावासीसँग आग्रह गरेका छन् । 
 
भरतपुर महानगरपालिकाकी मेयर रेनु दाहाल र जिल्ला समन्वय समिति चितवनका प्रमुख कृष्ण कुमार डल्लाकोटीले बुधबार भरतपुरमा पत्रकार सम्मेलनमार्फत धुर्मुस सुन्तली फाउन्डेसनलाई पूर्वयोजना अनुसार क्रिकेट रंगशाला निर्माण सुचारु गर्न आह्वान गरेका छन् । 
 
स्थानीयको एउटा समूहले निर्माणस्थलमा लगाएको बारमा डोजर लगाएपछि उत्पन्न विवाद साम्य भइसकेको छ । अहिलेसम्म गौतमवुद्ध अन्तरराष्ट्रिय क्रिकेट रंगशालाको काम भने सुचारु हुन सकेको छैन । 
 
डोजर चलेको दुई दिनपछि धुर्मस–सुन्तली फाउण्डेसनले काम गर्ने वातावरण नभएको भन्दै साइड अफिस नै बन्द गरेर काम स्थगन गरेको थियो । 
 
रंगशालाको निर्माण स्थलमा सुरक्षाको वातावरणदेखि आर्थिक संकलनसम्मको अभियान तीव्र भएको हुनाले पुनः काममा फर्कन फाउन्डेसनलाई महानगर प्रमुख दाहालले आग्रह गरेकी छन् । 
 
समितिका संयोजक तथा जिल्ला समन्वय समिति प्रमुख कृष्णकुमार डल्लाकोटी र भरतपुर महानगर प्रमुख रेनु दाहालद्वारा जारी विज्ञप्तिमा रंगशाला निर्माण कार्य पूर्वयोजनाअनुसार नै सुरु गर्न धुर्मुस सुन्तली फाउण्डेसनलाई आव्हान गरिएको हो ।
 
विज्ञप्तिमा, निर्माण कार्यको निम्ति वातावरण सहज रहेको र आवश्यक सम्पूर्ण सहयोग गर्न स्थानीय सरोकारवाला निकाय, राजनीतिक दलहरु, जनप्रतिनिधिहरु, सरकारी निकायका प्रमुखहरु, निजी क्षेत्रका प्रमुखहरु, सामाजिक व्यक्तित्वहरु, पत्रकारहरु, सामाजिक अभियान्ताहरु, क्रियाशील व्यक्तित्वहरु र आम चितवन तथा देशभरका जनसमुदायहरुको उत्साहपूर्वक सहयोग गर्न तयार रहेको जनाइएको छ ।