प्रवास

नर्थ क्यारोलाइनामा २०६ औं भानु जयन्ती

166 पटक पढिएको

- हिमालयखबर संबाददादा | 9th Jul 2019, Tuesday | २०७६ आषाढ २४, मंगलवार १७:३३
नर्थ क्यारोलाइना (अमेरिका) – नेपाली साहित्य समाज, अन्तराष्ट्रिय नेपाली साहित्य समाज, नर्थ क्यारोलाइना च्याप्टर तथा नेपाल सेन्टर अफ नर्थ क्यारोलाइनाको संयुक्त आयोजनामा २०६ औं भानुजयन्ती सम्पन्न भएको छ । 
 
आदिकवि भानुभक्त आचार्यको तस्बिरमा फुलमाला अर्पण र पानसमा दियो बालेर सुरू भएको कार्यक्रमको संचालन संस्थाकी उपाध्यक्ष नम्रता गुरागाईंले गर्नुभएको थियो । उपस्थित सहभागीहरूलाइ संस्थाकी कोषाध्यक्षा सुजाता ढुङ्गेलले स्वागत गर्नुभएको थियो । 
 
कार्यक्रममा साहित्यकार हरिहर भट्टराइले नेपाली भाषाका लागि भानुभक्तको योगदानमाथि प्रकाश पार्दै शुद्घ नेपाली भाषा लेखनमा जोड दिनु भयो । दुइ चरणमा भएको उक्त कार्यक्रमको पहिलो शत्रमा ५ देखि १५ वर्ष उमेर समुहका भाइबहिनीहरुका बीच “दशैं” विषयक बकृत्वकला प्रतियोगिता भएको थियो । डा. नारायण राजभण्डारी, डा.ऋषि बस्ताकोटी र इश्वर देबकोटाको निर्णायक मण्डल रहेको उक्त प्रतियोगितामा ५ देखि ६ वर्ष सम्मको उमेर समुहबाट बिभुषा गौतम प्रथम, सुप्रिम तिमल्सिना दोस्रो र नेरिका प्रधान तेस्रो भएका थिए । 
 
७ देखि ८ वर्ष उमेर समुहबाट श्रेया ढकाल प्रथम, सुभम ढुंगेल दोस्रो र सौरभ नेपाल तेस्रो भएका थिए । ९ देखि ११ वर्ष उमेर समुहबाट निर्बिरोध तिमल्सिना प्रथम, सौर्यभी ढकाल दोस्रो र अन्बेषण अधिकारी तेस्रो भएका थिए । त्यस्तै १२ देखि १५ वर्ष उमेर समुहबाट सम्पदा आचार्य प्रथम, सुहानी ढुंगेल दोस्रो र सगुन आचार्य तेस्रो भएका थिए । 
 
कार्यक्रमको सभापतित्व नर्थ क्यारोलाइना नेपाली साहित्य समाज तथा अनेसास नर्थ क्यारोलाइना च्याप्टरका अध्यक्ष शिखर दुलालले गर्नु भएको थियो । अतिथिको आशनग्रहण संस्थाका सल्लाहकार डा. नारायण राजभण्डारी, डा.हरिहर भटटराइ र इश्वर देबकोटाले गर्नुभएको थियो । नेपाल सेन्टर अफ नर्थ क्यारोलाइनाका महासचिब विक्रम गौतमले भानुभक्तिय भेषमा अतिथिको आसन ग्रहण गर्नुभएको थियो ।   
 
कार्यक्रमको दोस्रो चरणमा खुल्ला कविता वाचन राखिएको थियो । कविता वाचनमा निर्मला राजभण्डारी, सुजाता ढुङ्गेल, डा. नारायण राजभण्डारी, नन्दलाल सुबेदी, इश्वर देबकोटा, नम्रता गुरागाईं र शिखर दुलालले आ–आफनो कविता वाचन गर्नुभएको थियो। आजका भानुभक्त विक्रम गौतमले भानुभक्तको कविता कान्तीपुरी नगरी पाठ गर्नुभएको थियो । 
 
कार्यक्रमको अन्त्यमा सस्थाका अध्यक्ष शिखर दुलाल तथा अतिथीहरु सबैले विजयीहरुलाइ पुरस्कार प्रदान गरिएको थियो । कार्यक्रमका प्रायोजक नेपाल सेन्टर अफ नर्थ क्यारोलाइना, डा. सोमनाथ चालिसे र समाजसवी रविन्द्र कार्कीले गरेका थिए ।