हिमालयखवर संवाददाता

अमेरिका– गैरकानुनी र कानुनी कागजात नभई रुपमा अमेरिका वस्दै आएकाहरुलाई पक्राउ गरी फिर्ता पठाउन आइतवार देखि घरपकड गरिने भएको छ ।

 

अमेरिकाको इमिग्रेशन हेर्ने निकाय इमिग्रेसन एण्ड कस्टमस् इन्र्फोस्मेण्ट (आईसीई)ले इमिग्रेशन अदालतले फिर्ता जान आदेश दिदां पनि अटेर गर्दै अमेरिका वस्दै आएकालाई फिर्ता पठाउन आइतवार देखि अभियान शुरु गर्न लागेको हो ।

 

आईसीईले शुरुमा मुख्य रुपमा १० वटा शहरलाई लक्षित गरि यो अभियान संचालन गर्न लागेको अमेरिकी संचार संस्था सीएनएनले जनाएको छ ।

 

अमेरिकी राष्ट्रपति डोनाल्ड ट्रम्पले केही दिन अघि टुईट गर्दै यो अभियानका वारेमा जानकारी दिएका थिए । घरपकड र फिर्ता पठाउने अभियान आवश्यक भएको र यसमा १० औं लाखलाई सम्वन्धित देश पठाइने राष्ट्रपति ट्रम्पले सार्वजनिक गरेका थिए ।

 

यदी अमेरिकामा गैरकानुनी रुपमा वस्दै आउनुभएको छ, भने हटाइने छ आईसीईका कार्यवाहक प्रमुख मार्क मोरग्यानले बुधवार पत्रकार सम्मेलनमा भने । यो अभियानका लागि सम्वन्धित सरकारी अधिकारीहरुलाई तालिम र अन्य पक्षवाट पनि तयारी गरिएको जनाईएको छ । तर, के कसरी यो अभियान चलाइन्छ यो भने गोप्य राखिएको छ ।

 

यो कारवाही मुख्य रुपमा एट्लान्टा, बाल्टिमोर, सिकागो, डेभनर, ह्यूस्टन, लसएञ्जल्स, मियामी, न्यूओरल्यान्स, न्यूर्योक र सनफ्रान्सिस्कोमा केन्द्रित गरिने सीएनएनले सम्वन्धित स्रोतलाई उदृत गर्दै समाचारमा उल्लेख गरेको छ । शुरुमा यो कारवाही इमिग्रेशसन अदालतले अमेरिका छाड्न आदेश दिएका करिव २ हजार माथि केन्द्रित हुने जनाईएको छ । यी दुई हजार आप्रावासीलाई अमेरिका छाड्न लिखित रुपमा जानकारी दिईएको थियो ।

 

दोस्रो कार्यकालका लागि चुनावी अभियान शुरु संगै ट्रम्पले कागजात विहिन आप्रावासी प्रति अझ कडा हुने अभिव्यक्ति दिन शूरु गरेका छन् । आउने कार्यकालका लागि पनि ट्रम्पको मुख्य एजेण्डा गैरकानुनी आप्रावासी नै स्पष्ट भएको छ । ट्रम्पले केही साता यता गैरकानुनी आप्रावासीको प्रवाहलाई रोक्न मेक्सिको लगायत मध्ये अमेरिकी देशलाई दवाव दिएका थिए ।

 

ट्रम्पले गत राष्ट्रपति निर्वाचनमा पनि इमिग्रेशन लाई मुख्य मुद्दा वनाएका थिए । त्यसवेला कयौंले उनले जित्नेमा शंका व्यक्त गरेका थिए । तर, अहिले ट्रम्पका एजेण्डालाई सवैले संवेदनशील रुपमा लिएका छन् । तस्बिर: सामाजिक संजाल