हिमालयखवर संवाददाता-

अमेरिका । अमेरिकामा बसाई गर्ने दक्षिण एशियाली मुलुकका नागरिक मध्ये सन् २०१० देखि २०१७ सम्म नेपालीको जनसंख्या सवैभन्दा धेरै प्रतिशतले बृद्धि भएको छ ।

 

दक्षिण एशियाली देशका वारेमा अध्ययन र विवरण राख्ने सामाजिक संस्था दक्षिण एशियन अमेरिकन्स लीडिगं टुगेदर (साल्ट)ले आफ्नो स्न्यापच्याटमा अमेरिकामा नेपालीको जनसख्या २०१० देखि २०१७ सम्मको अवधिमा २०६ दशमलव ६ प्रतिशतले बृद्धि भएको जनाएको छ ।

 

उक्त सात बर्षमा अमेरिकामा दक्षिण एशियाली मुलका नागरिकको जनसंख्या बृद्धि ४० प्रतिशतले भएको छ । हाल करिव ५० लाख ४० हजार दक्षिण एशियाली मुलका नागरिक अमेरिकामा बसाई रहेको साल्टले जनाएको छ ।

 

सन् २०१० देखि २०१७ सम्मको अवधिमा भारतीयको जनसंख्या ३८ प्रतिशत, भुटानीको जनसंख्यामा ३८ प्रतिशत, पाकिस्तानी ३३ प्रतिशत, बंगलादेशी २६ प्रतिशत र श्रीलंकन १५ प्रतिशत बृद्धि भएको साल्टको विवरणमा उल्लेख छ ।

डीभी लटरी लगायतले अमेरिका आउने नेपालीको संख्यामा बर्षेनी बृद्धि भएको हो । यो जनसंख्या बृद्धिसंगै अमेरिकावाट नेपाल जाने रेमिट्यान्समा पनि बृद्धि भएको छ । गत आर्थिक बर्ष नेपालले प्राप्त गरेको रेमिट्यान्स मध्ये अमेरिकावाट आएको पैसा सवैभन्दा वढी थियो ।

 

नेपालमा वस्दै आएका भुटानी शरणार्थीलाई अमेरिकाले स्थायी बसोवासको सुविधा दिदां १ लाख भन्दा वढी यहां आएका छन् ।

 

अमेरिकामा बसोवास गर्ने दक्षिण एशियाली मुलका नागरिक मध्ये १० प्रतिशत गरिबीको रेखामुनी रहेको पनि साल्टले जनाएको छ । चार जना भएको परिवारको आम्दानी औषतमा २५ हजार १०० भन्दा तल छ भने यो अमेरिकामा गरिबीको रेखामुनी मानिन्छ । यो अंक अलस्का र हवाई राज्यमा भने फरक छ । प्रत्येक बर्ष यो रकम परिवर्तन हुन्छ ।  साल्टका अनुसार दक्षिण एशियाली मुलका मानिसमा धनी र गरिबको अन्तर निकै उच्च छ ।

 

साल्टले उक्त सात बर्षको अवधिमा अमेरिकामा आश्रय (एजाइलम) खोज्ने नेपालीको संख्या पनि उच्च दरले बृद्धि भएको छ । साल्टका अनुसार अक्टोबर २०१४ देखि अप्रिल २०१८ सम्म १७ हजार ११९ दक्षिण एशियाका नागरिक इमिग्रेशन कानुन विरुद्ध काम गरेको आरोपमा पक्राउ परेका छन् ।