काठमाडौँ । प्रधानमन्त्री केपी शर्मा ओली सामाजिक सञ्जालप्रति आक्रामक बनेका छन् । उनले सोमबार पत्रकार सम्मेलन गर्दै सामाजिक सञ्जाल प्रयोगकर्ताविरुद्ध आक्रोश पोखे ।
सामाजिक सञ्जालमा सरकारविरुद्ध व्यापक विरोध र आलोचना चुलिएपछि सरकारले मिडिया विधेयक ल्याएर तह लगाउने रणनीतिमा छ । सोही बमोजिम सूचना प्रविधिसम्बन्धी कानुन बनाएर नियमन गर्ने तयारीमा जुटेको छ ।
सरकारले संसद्मा दर्ता गराएको सूचना प्रविधिसम्बन्धी व्यवस्था गर्न बनेको विधेयकमा सामाजिक सञ्जालको स्ट्याटसमा कसैलाई होच्याउने, झुक्याउने, अपमानित गर्ने आसय प्रकट भएमा पाँच वर्षको कैद सजाय र १५ लाखसम्म जरिवाना तिर्नुपर्ने कडा कानुन ल्याउन लागेको छ ।
यसैको विरुद्धमा प्रेसजगत, प्रतिपक्ष तथा नागरिक समाजले चरणवद्ध विरोधका कार्यक्रम गर्दै आएका छन् । पत्रकार सम्मेलनमा ओलीले सामाजिक सञ्जाललाई गुरु थापेर कस्तो समाज निर्माण गर्न खोजिँदैछ भनेर आक्रोश पोखेका छन् ।
सोमबार प्रतिनिधिसभामा कांग्रेसको अवरोधका कारण बोल्न नपाएका उनले प्रतिपक्षदेखि पत्रकारसम्मको चर्को आलोचना गरे । उनले प्रतिक्रियावादीसँग मिलेर लोकतन्त्र नै मास्न खोजेकोजस्ता टिप्पणी पनि गरे ।
संसद्मा कांग्रेसले वेल घेराउ गरी बोल्न नदिएको प्रसंगमा उनले प्रधानमन्त्रीभन्दा पहिले बोल्न पाउनुपर्छ भन्नु कांग्रेसको बालहठको संज्ञा दिए । उनले भने, ‘यस्तो बालहठ लोकतन्त्रमा कहीँ हुँदैन ।’
संसद्मा बोल्न नपाएको झोंकमा पत्रकार सम्मलेन गरी आक्रोश पोखे पनि उनले यसको बचावट गरे । उनको आक्रोश यतिसम्म थियो कि उनले पत्रकारहरुले नेपाली भाषा नै बिगारेको भन्न भ्याए ।
सरकारी मिडियामा तपाईं, बताउनुभयो, उहाँलेजस्ता आदरार्थी शब्द प्रयोग हुने गर्छ । अन्य मिडियाले सबैलाई तिमी शैली प्रयोग गर्छ । उनले पत्रकारलाई तपाईं भन्न आउँदैन ? भनेर टिप्पणी गरे ।
उनले थपे, ‘हाम्रा टेलिभिजनले कसैलाई तपाईं भन्नै जान्दैन । तपाईं भन्ने नेपाली शब्दको भाषै हराइसक्यो । बाउलाई तिमी, हजुरबालाई तिमी, हजुरआमालाई पनि तिमी । यो त नेपाली संस्कृतिभित्र पर्दैन ।’ स्थापित सञ्चारमाध्यमले समेत सामाजिक सञ्जाललाई पछ्याइरहेको उनको भनाइ थियो ।
उनले आफू पत्रकार सम्मेलन गरिरहँदा गुठी विधेयक फिर्ता भएकोबारे सञ्चारमाध्यमबाट थाहा पाएको भनेर व्यंग्य कसे । गुठी विधेयकबारे हिजो उनले उपत्यकाका जनप्रतिनिधिलाई बोलाएर छलफल गरेका थिए । पार्टी र क्याबिनेटमा छलफल गरेर निर्णय लिने बताएका थिए ।
गुठी विधेयकविरुद्ध सत्तापक्षकै सांसद् विरोधमा उत्रिएपछि सरकार बाध्य भएर पछि हटेको हो । तर, उनले सरकारको बचावट गर्दै लोकतान्त्रिक विरोधी शक्तिले लोकतन्त्रको जरा काट्न कैंची चलाउन थालेको देखेर विधेयक फिर्ता लिइएको बताए ।
उनले नेपालका केही बुद्धिजीवी देख्दा शरम लाग्ने गरेको भन्दै मर्यादित भएर बोल्न सुझाव दिए ।
प्रतिक्रिया