धादिङ । धादिङको गजुरी गाउँपालिकाको वडा नं ६ बन्छेटारस्थित पृथ्वी राजमार्गबाट त्रिशूली नदीमा बस खस्दा मृत्यु हुनेको संख्या आठ पुगेको छ ।
काँकडभिट्टाबाट काठमाडौँका लागि छुटेको ना ७ ख ४३८७ नम्बरको रात्रिबस आइतबार बिहान ६ बजेतिर दुर्घटनामा परेको थियो । बस सडकबाट ३० मिटर तल त्रिशूली नदीमा खसेको थियो । प्रत्यक्षदर्शी स्थानीयवासीका अनुसार बसले सडक छेउको फलामे तारबार भत्काएर नदीमा खसेको थियो ।
दुर्घटनामा इलामको कन्याम निवासी २० वर्षीय विशाल गिरी, चन्द्रागिरि नगरपालिका बस्ने ३५ वर्षीया सीता थपलिया र थानकोट निवासी ५१ वर्षीय राजकुमार सुवेदी र धादिङ बेनिघाट रोराङका राजन आचार्यको मृत्यु भएको इलाका प्रहरी कार्यालय गजुरीले जनाएको छ । दुर्घटनामा मृत्यु हुनेहरुमा प्रकाश श्रेष्ठ र शेखर मगरको ठेगाना खुल्न सकेको छैन भने अन्य दुई जनाको सनाखत हुन नसकेको प्रहरीले जनाएको छ ।
दुर्घटनामा २९ जना घाइते भएकोमा १४ जनाको अवस्था चिन्ताजनक रहेकोमा उनीहरुलाई उद्धारपछि तत्काल काठमाडौँ पठाइएको थियो । बाँकी घाइतेहरुलाई स्थानीय स्वास्थ्य संस्थामा प्रारम्भिक उपचारपछि काठमाडौँ पठाइएको छ ।
प्रतिक्रिया