ड्यालस (अमेरिका) – गैर आवासीय नेपाली संघ (एनअारएन) अमेरिकाले प्रदान गर्ने युथ लिडरशीप अवार्डको लागि आवेदन दिने अन्तिम मिति आउन अब तीन दिनमात्र बाँकी छ ।
अमेरिकामा अध्ययनरत युवा विद्यार्थीलाइ प्रोत्साहन गर्ने उद्वेश्यले स्थापना भएको यो अवार्डका लागि आउँदो मे १५ सम्म अावेदन दिइसक्नुपर्नेछ । बिभिन्न चार विधामा जनही एकहजार अमेरिकी डलर प्रदान गरिने यो अवार्डमा सहभागी हुनका लागि अमेरिकी नागरिक, ग्रीनकार्ड होल्डर, टिपिएस वा एफवान स्टाटसमध्य कुनै पनि एक भए हुने जनाइएको छ । कलेजको पूर्णकालिन विद्यार्थीका रूपमा चार वर्षिय कलेज वा विश्वविद्यालयमा अध्ययनरत रहि कम्तिमा ३.२५ जिपिए हाँसिल गरेको विद्यार्थीले आवेदन दिन सक्नेछन् । ३० कलेज क्रेडिट समाप्त गरिसकेको हुनुपर्ने समेत जारी सूचनामा जनाइएको छ ।
अवार्ड छनाैटका लागि एनआरएन अमेरिकाका युथ कोअर्डिनेटर स्वराज खातीको संयोजकत्वमा समिति गठन भएको छ । यो समितिमा डा. निरज बस्नेत, कुशल पोखरेल, डा. सुमन सत्याल र डा. सिरोज पोखरेल छनाैट समितिमा रहेका छन् ।
‘यो अवार्डबाट अमेरिकामा अध्ययनरत नेपाली विद्यार्थीको हाैसला बढ्ने र उनीहरूको शैक्षिक यात्रामा सहयोग पुग्ने अपेक्षा लिएका छाै,‘ एनआरएनएका युथ कोअर्डिनेटर खातीले भने । यो वर्ष सामुदायिक कलेजका विद्यार्थीहरूले समेत आवेदन दिन पाउने प्रावधानले बढीभन्दा बढी सहभागिता हुने अपेक्षा गरिएको छ।
छात्रवृत्ति छनाैट समितिमा निलिमा बादे श्रेष्ठ, सुलभ पाैडेल, प्रकाश बस्नेत र सुमन कार्की सदस्य रहेका छन् । संयोजक खातीले अवार्डको डेडलाइनभन्दा अगावै आवेदन दिनका लागि विद्यार्थीसँग आग्रह गरेका छन् ।
प्रतिक्रिया