हिमालयखवर संवाददाता- 

अमेरिका । अन्तत अमेरिकाले पनि बोइगं ७३७ म्याक्स ८ र ९ सिरिजका जहाजको  उडान थप विवरणहरु प्राप्त नहुंदासम्म स्थगन गर्ने निर्णय गरेको छ । राष्ट्रपति डोनाल्ड ट्रम्पले व्यापक दवावपछि यो जहाजको उडान स्थगन गर्नु परेको वताएका छन् ।

 

गत साता इथोपियामा म्याक्स जेट दुर्घटना पछि  यो विमानको कति सुरक्षित छ भन्ने प्रश्न उठेको थियो ।

 

इथोपिया एयरको उक्त जहाज जमिन छाडेको ६ मिनेटमै दुर्घटनामा परेको थियो । जसमा विमानका कर्मचारी सहित १५७ जनाको मृत्यु भएको थियो । पांच महिना अघि इन्डोनोसियामा पनि लायन एयरको उक्त बोइगं म्याक्स जहाज दुर्घटनामा परेको थियो । छोटो अवधिमा दुई यी सिरिजका जहाजहरु दुर्घटनामा परेपछि यसको सुरक्षाका वारेमा विभिन्न प्रश्नहरु उठेको थिए ।

 

अमेरिकाले उक्त जहाज उडान स्थगन गर्नु अघिनै विश्वका ४० भन्दा वढी देशले उक्त जहाज उडान रोकेका थिए । चीन, भारत लगायत कयौं देशले यो विमान उडन प्रतिवन्ध लगाएका छन । तर अमेरिकाले भने उडानका लागि उक्त जहाजमा कुनै समस्या नरहेको भन्दै आएको थियो । अहिलेको यो निर्णय यसको ठिक विपरित हो ।

 

अमेरिकन एयरलाइन्स, साउथ वेष्ट लगायतले मध्यम दुरीको उडानमा बोइगंको म्याक्स प्रयोग गर्दै आएका थिए । यो जहाज बोइगंले निमार्ण गरेको नयां सिरिजका हुन । इन्धन किफायती, करिव २ सय यात्रु क्षमताका यी जहाजको माग वढीरहेका वेला इथोपिया एयरको दुर्घटनाले बोइगंलाई निकै धक्का लागेको छ । बोइगंले यो विमानका लागि ४ हजार भन्दा वढीको अर्डर पाएको थियो ।

 

यो विमानको उडान स्थगित हुदां बोइगंको शेयर मूल्यमा पनि गिरावट आएको छ । न्युयोर्क स्टक एक्स्चेञ्जमा लिस्टिगं भएको बोइगंको शेयर यो साता लगातार गिरावट आईरहेको छ ।

 

बोइगंले भने यो जहाजको प्राविधिक पक्षमा कुनै शंका नहरेको दावी गर्दै उडानका लागि सुरक्षित रहेको वताउंदै आएको छ । इन्डोनेसिया र इथोपियामा यी जहाज दुर्घटना हुनुका कारणको विस्तृत अनुसन्धान भईरहेको पनि बोइगंले जनाएको छ ।