न्यूयोर्क (अमेरिका)– एनअारएन अमेरिकाका वर्तमान वरिष्ठ उपाध्यक्ष सुनिल साहले उम्मेदवारी घोषणा गरेको भोलीपल्ट न्यूयोर्कमा सञ्जय थापाले अागामी नेतृत्वमा अध्यक्षका लागि उम्मेदवारी घोषणा गरेका छन् । 

 

एनअारएन अमेरिकाको वर्तमान बोर्ड अफ डाइरेक्टर थापाले अाइतबार न्यूयोर्कमा विशेष कार्यक्रमबीच अाफ्नो उम्मेदवारी घोषणा गरेका हुन् । थापाले अमेरिकामा रहेका हरेक नेपालीको समृद्धि र दोस्रो पुस्तालाइ सुन्दर भविष्य दिने अाफ्नो मुख्य एजेण्डा रहेको समेत स्पष्ट पारे । 

 

‘दुई वर्षमा धेरै कुरा गर्न नसकिने भएकाले महत्वाकांक्षी कार्यक्रम घोषणा गर्नुको अर्थ छैन,‘ उनले भने । थापाले हाम्रो एनआरएन राम्रो एनआरएन बनाउँन ठुला कुरा भन्दा पनि सानो काम गर्ने बताए ।

 

उनले भने- हामीमध्ये धेरैले खास मानेमा अमेरिका किन आएको भन्ने नै पुष्टी गर्न सकेका छैनौ। हामीमध्ये धेरैको जीवन नेपालको भन्दा पनि तल्लो स्तरको छ। यो सत्यलाई स्वीकार्नुको विकल्प हामीसँग छैन ।

 

उनले एनआरएनमा प्रत्यक्ष चुनाव हुनुपर्ने धारणा राखे र सबैले छर्लङ्गै देख्न सक्ने पारदर्शी एनआरएन हुनुपर्ने आफ्नो प्रमुख एजेण्डा रहेको बताए ।

 

उनले निर्वाचन आयोगलाई निस्पक्ष, विश्वसनीय र पारदरर्शी चुनाव गर्नका लागि केही सुझाव पनि दिए ।

 

पत्रकार र अमेरिकाको खासगरी न्युयोर्कको नेपाली डायस्पोराका अगुवाहरूको उपस्थिति रहेको उम्मेद्वारी घोषणा समारोहमा प्रवासी नेपाली मञ्चका अध्यक्ष प्रभु थापा, मञ्चका महासचिव राधाकृष्ण देउजालगायतका मञ्चका नेता एवं कार्यकर्ताहरूको पनि समारोहमा उपस्थिति रहेको थियो ।