काठमाडौँ । नेपाल कम्युनिष्ट पार्टी (नेकपा) का वरिष्ठ नेता माधवकुमार नेपालले चिन्तन र विचारलाई परिवर्तन नगरेसम्म संविधानमा भएका महिला अधिकार प्राप्ति नहुने बताएका छन् ।
एक सय नवौँ अन्तर्राष्ट्रिय नारी दिवसका अवसरमा राष्ट्रिय नागरिक विकास समाजले आज आयोजना गरेको अन्तक्र्रियामा वरिष्ठ नेता नेपालले संविधानमा महिलाका लागि अधिकारको कुनै कमी नभए पनि व्यवहारमा महिलाले अधिकार प्राप्त नगरेको बताउँदै सो को कार्यान्वयनका लागि चेतना र जागरणका कार्यक्रम ल्याउनुपर्नेमा जोड दिए ।
अहिले पनि बोक्सी प्रथा, सासूले बुहारीलाई राम्रो व्यवहार नगर्ने, महिला हिंसाजस्ता थुप्रै समस्या रहेको भन्दै उहाँले महिला र बाहुनले हलो चलाउनु हुँदैन भन्ने पुराना मान्यतालाई भोजपुरका योगमायाजस्ता महिला नेत्रीले आन्दोलन गरेको स्मरण गर्दै महिला पक्षधरलाई प्रोत्साहन दिनुपर्ने आवश्यकता बताए ।
नेपाली काङ्ग्रेका नेता भीमसेनदास प्रधानले नेपाली जनताले पहिलोपटक महिलामुखी तथा समावेशी संविधान बनाएको बताए । उनले महिलाले राज्यबाट पाउनुपर्ने अधिकार प्राप्त गरे पनि सामाजिक, आर्थिक तथा सांस्कृतिक अधिकार नपाएकाले उनीहरु विभेदको शिकार भइरहेको बताए ।
कार्यक्रममा उद्योग, आर्थिक, शिक्षा, समाजसेवा, साहित्य क्षेत्रमा योगदान गर्ने २० महिलालाई सम्मान गरिएको थियो । रासस
प्रतिक्रिया