ड्यालस (अमेरिका)– ड्यालसको परिचय अमेरिकामा सबैभन्दा धेरै नेपालीहरू रहेको स्थानका रूपमा त छँदैथियो । थपमा नेपाली भाषा साहित्यको लागि प्रवासको उर्वरभूमिका रूपमा समेत परिचित हुने तरखरमा छ ।

 

यसैसाता सम्पन्न भएको ‘गजल उत्सव-२‘ ले ड्यालसको परिचय अमेरिकामा रहेका नेपाली साहित्यकार माझ अझै उजेलिएको छ । विशेषगरि गजल साहित्यको क्षेत्रमा ड्यालसका युवाहरूले गत वर्षदेखि थालेको अभियानले यसपटक झनै झाङि्गने अवसर पाएको छ । 

 

 

शनिबार अर्भिङको नेपाली मन्दिरमा खचाखचबीच गजलकारहरूले वाचन गरेका थिए । अघिपछि विवाह, ब्रतबन्ध वाहेक विरलै खचाखच हुने हलमा शनिबार गजल सुन्नकै लागि पाइला राख्ने ठाउँ थिएन । गजल सुनाउनका लागि अमेरिकाका पूर्बीतटदेखि पश्चिम तटसम्मका साहित्यकारहरूको उत्साहप्रद सहभागिता थियो । लगातार ६ घण्टा २० मिनेटसम्म कार्यक्रम चलेको थियो । 

 

बोस्टनबाट गोवर्धन पूजादेखि लिएर न्यूजसर्सीबाट कृष्ण कुसुम, कोलोराडाबाट पदम विश्वकर्मा लगायतका साहित्यकारको उत्साहजनक सहभागिता थियो । 

 

कार्यक्रमको दोश्रो दिन अाइतबार बिहान स्थानीय फिस्टेल रेस्टुरामा भएको "गजल कार्यशाला" अन्तर्कृयात्मक थियो ।