काठमाडौँ । प्रधानमन्त्री केपी शर्मा ओलीले जनतालाई विश्वास जगाउनेगरी विकासको गतिलाई तीव्र रुपमा अघि बढाइने दाबी गरेका छन् ।
सोमबार सिंहदरबारमा मानव संसाधन प्रक्षेपण कार्यदलको बैठकलाई सम्बोधन गर्दै उनले विकासको गतिलाई द्रुत गतिमा कसरी बढाउनु पर्दछ भन्ने जानकारी सरकारलाई रहेको बताए ।
उनले थपे, “छोटो समयमा कसरी छिटो विकास हुन्छ भन्ने कुरा हामी जनतालाई विश्वास हुने गरी देखाउँछौँ ।”
सरकारले विभिन्न क्षेत्रमा के कति जनशक्ति आवश्यक पर्छ त्यसलाई तथ्यगत रुपमा अध्ययन गर्न गत असोज २८ गते डा रुद्र सुवालको संयोजकत्वमा सात सदस्यीय मानव संसाधन प्रक्षेपण कार्यदल गठन गरेकोे थियो ।
समितिका अन्य सदस्यमा डा माधव दाहाल, डा इन्दिरा पराजुली, डा विश्ववाला थापा, डा विजयदत्त, डा ध्रुव गौतम र डा राजेश अहिराज रहेका छन् ।
योजनाबद्ध विकासका लागि मानव संसाधन प्रक्षेपण आवश्यक रहेको प्रधानमन्त्री ओलीले जोड दिँदै सरकार समृद्ध नेपाल, सुखी नेपाली बनाउने कार्यमा उच्च प्राथमिकतासाथ लागेको बताए ।
ओलीले हरेक क्षेत्रमा कति जनशक्ति आवश्यक पर्दछ भन्ने जानकारी हुनुपर्ने चर्चा गर्दै कार्यदलले बनाउने प्रतिवेदनले मानव संसाधन आपूर्तिलाई मार्गदर्शन गर्न निर्देशन दिए ।
प्रधानमन्त्री ओलीले कार्यदलका सदस्यहरुलाई विषयको गम्भीरतालाई बुझेर अनुसन्धानमूलक र गहन अध्ययनका साथ काम गर्न निर्देशन दिए ।
“आगामी धेरै वर्षसम्म यस कार्यदलको प्रतिवेदनलाई जनशक्ति व्यवस्थापनका लागि आधार बनाइन्छ, चिकित्सक, इञ्जिनियर, शिक्षक कति चाहिने, कृषिमा कति जनशक्ति चाहिने यी सबै कुरा तथ्यगत रुपमा कार्यदलले ल्याउनुपर्दछ । आगामी दिनका लागि यो प्रतिवेदन निर्देशन पुस्तिका हुनेछ,” उनले भने ।
कार्यदलले ल्याएको तथ्यगत प्रतिवेदनका आधारमा राष्ट्रिय योजना आयोग, विभिन्न मन्त्रालयले पनि योजना बनाउने भएकाले यसलाई त्रुटिरहित बनाउन प्रधानमन्त्री ओलीले निर्देशन दिए ।
कार्यदलको निर्देशक समितिको संयोजकमा शिक्षा, विज्ञान प्रविधिमन्त्री रहेका छन् । कार्य दलको समयावधि चार महिना रहेको छ ।
प्रतिक्रिया