भरतपुर । नेपाल स्काउट चितवनको भवन रहेको जग्गा संगठनको नाममा दर्ता गर्ने व्यवस्था मिलाइ दिन नेपाल स्काउटका जिल्ला आयुक्त तीर्थराज न्यौपानेले चितवनका तीन सांसदसँग निवेदन गरेका छन् ।
आयुक्त न्यौपानेले सांसद् एवम् पूर्वप्रधानमन्त्री पुष्पकमल दाहाल ‘प्रचण्ड’, सांसद सुरेन्द्र पाण्डे एवम् सांसद कृष्णभक्त पोखरेललाई छुट्टाछुट्टै भेट गरी स्काउट चितवनको नाममा जग्गा दर्ता गर्ने व्यवस्था मिलाइदिन निवेदन पेस गरेका हुन् ।
स्वयंसेवाको क्षेत्रमा आफ्नै विशिष्ट पहिचान बनाएको स्काउटको विश्वग्राममा आवद्ध नेपाल स्काउटले स्थापनाको ६५ वर्ष पूरा गरेको छ । विश्वका २२३ देशका ४ करोड बढी सदस्य रहेको सो संगठनमा नेपाली सभ्यताका सबै तह र तप्काका ६० हजारभन्दा बढी सदस्य प्रत्यक्षरुपमा आवद्ध छन् ।
बालबालिका तथा युवालाई आत्मनिर्भर, आत्मसक्षम, नैतिकवान, चरित्रवान एवम् अनुशासित बनाई समाज र राष्ट्रको समुन्नत विकासमा योगदान दिनसक्ने सबल नागरिक तयार गर्ने उद्देश्यले नेपाल स्काउटले आफ्नो यात्रा अगाडि बढाइरहेको छ ।
नेपाल सरकारले संसद्बाट ऐनद्वारा स्थापित गरेको सो संस्थाको संरक्षक प्रधानमन्त्री रहने व्यवस्था छ । ‘तयार होऊ’ भन्ने स्काउटको सर्वस्वीकार्य सिद्धान्तमा आधारित रही सदैव स्वयंसेवाको भावनाले ओतप्रोत रहेर राष्ट्रसेवामा अग्रसर महिला÷पुरुष स्काउटहरु सधैँ क्रियाशील रहेर देशका विभिन्न क्षेत्रमा योगदान दिइरहेका छन् ।
नेपाल स्काउट ऐन, २०५० परिमार्जनमा लागि संघीय संसद्मा छलफलका क्रममा रहेको छ । नेपाल स्काउटको ०६८ मा भएको निर्वाचन ४-४ वर्षमा हुनुपर्नेमा हालसम्म पनि हुन सकेको छैन । जसका कारण अन्योलको स्थिति देखापरेकाले उक्त ऐनलाई संसद्बाट अगाडि बढाइदिनसमेत जिल्ला आयुक्त न्यौपानेले सांसद्हरुसँग आग्रह गरेका छन् ।
प्रतिक्रिया