हिमालयखबर संबाददाता

ड्यालस (टेक्सस) – एउटा पुलिस अफिसरको दिमागले काम नगर्दा समाज र समाजलाई कति क्षती गर्छ भन्ने तथ्यलाई बिहीबार यहाँ भएको एउटा दुखद् घटनाले पुष्टी गरेको छ ।

 

ड्यालस पुलिस डिपार्टमेन्टमा काम गर्ने एक प्रहरी अधिकृत अम्बर गाइगरले विहीबार राति आफ्नो अपार्टमेन्ट भन्दै अर्कै व्यक्तिको अपार्टमेन्टमा पसेर त्यहाँ बस्ने एक युवकलाई गोली हानिन् । सामान्य सोधपुछ समेत नगरि ३० बर्षिया गाइगर गोली हानेको खुलेको छ । गाइगरलाई आइतबार पक्राउ गरेर जेल राखिएको छ ।

 

डाउनटाउन ड्यालस नजिकै रहेको साउथ साइड अपार्टमेन्टमा पसेर गाइगरले त्यहाँ बस्ने २६ बर्षिय बोथन सेम जिमलाई गोली हानेकी थिइन् । आफ्नो अपार्टमेन्ट भन्दै जिम बस्ने अपार्टमेन्टमा गएर गोली हानेको सञ्चारमाध्यमहरुले जनाएका छन् ।

 

क्यारेबियन टापु सेन्ट लुइसामा जन्मेका जिम हाल प्राइसवाटर कुपर नामक कम्पनीमा काम गरिरहेका थिए । उनका पिता त्यहाँको मन्त्री र आमा उच्च सरकारी अधिकृत हुन् ।

 

हत्या गर्ने प्रहरी अधिकृतको पहिचान भैसक्दा पनि पक्राउ नगरिएको विषय निकै आलोचना भएपछि आइतबार गाइगरलाई पक्राउ गरिएको हो । 

 

अमेरिकामा प्रहरीको व्यबहारको विषयलाई लिएर पछिल्ला दिनहरुमा निकै आलोचना बढिरहेको छ । असुरक्षाको महसुस हुनुभन्दा पहिलेनै जथाभावी गोली हान्ने, पक्राउ गरेकालाई अमानवीय व्यबहार गरिएका समाचारहरु दिन प्रतिदिन बढिरहेका छन् । 

 

डिउटी समयभन्दा बाहिर रहेकी गाइगरले अर्काको अपार्टमेन्टमा गएर गोली हानेर हत्या गर्नुले प्रहरीफोर्स प्रति सर्वसाधारणमा समेत आक्रोश बढाएको छ ।

 

केही दिन अघिमात्र अमेरिकी राज्य कोलोराडोमा एकजना नेपालीमाथि प्रहरीले बिना कारण गोली चलाउँदा २५ बर्षिय बीरेन्द्र ठकुरी मारिएका थिए । अहिलेसम्म उनलाई प्रहरीले मार्नु पर्नाको कारण खुल्न सकेको छैन ।

 

तस्बिर: सामाजिक संजाल