पोखरा । कास्कीको बेगनासतालमा भएको डुंगा दुर्घटनामा दुई जनाको मृत्यु भएको छ । पाँच जना अझै बेपत्ता छन् ।
पोखरा–२८ की कृष्णकुमारी बजगार्इं र लेखनाथकी जमुना कडेंलको मृत्यु भएको प्रहरीले जनाएको छ । बेपत्ताहरुको खोजी कार्य जारी रहेको प्रहरीले जनाएको छ ।
बजगार्इंको लेखनाथ सामुदायिक अस्पतालमा र कँडेलको पश्चिमाञ्चल क्षेत्रीय अस्पतालमा उपचारका क्रममा मृत्यु भएको हो ।
बेगनासका स्थानीय गणेश कँडेलको घरमा तीजको दर खान आएका आफन्तहरु डुंगामा ताल घुम्न जाँदा डुंगा पल्टिएर दुर्घटना भएको बताइएको छ ।
बेपत्ता हुने अन्य आफन्तको प्रहरीले खोजी कार्य जारी राखेको जनाएको छ ।
डुङ्गामा नौ जना सवार रहेका थिए । दुई जना सकुशल रहेको प्रहरीले जनाएको छ । बेपत्ता हुनेमा नवलपरासीको गैँडाकोट घर भएका ३२ वर्षीय रवि खनाल, उनकै छोरा सात वर्षीय शङ्कर र आठ वर्षीय शिव खनाल, पाँच वर्षीय प्राचीन पौडेल र १७ वर्षीया मनिसा बजगाईं रहेकी छन् । खनाल नेपाली सेनामा कार्यरत रहेका थिए ।
उनीहरु तीज मान्नका लागि वेगनासताल पारि घर भएका आफन्त कमल कँडेलको घरमा आएको बताइएको छ । डुङ्गाघाट पुग्न करिब दुई सय मिटर वर लिप्दी भन्ने स्थानमा डुङ्गा दुर्घटना परेको थियो ।
उद्धार गर्न खोज्दा डुङ्गा डुब्यो
प्रहरीका अनुसार डुङ्गामा सवार प्राचीन पौडेल एक्कासी तालमा खसेपछि आमा निशा पौडेल उद्धारको लागि तालमा हाम फालिन् । तालमा हाम फालेपछि डुङ्गाको सन्तुलन गुम्यो र डुङ्गा पल्टिएसँगै सबै तालमा खसे । तालमा डुङ्गा पल्टिएलगत्तै स्थानीयबासी उद्धारमा जुटेकाले केहीलाई बचाउन सकिएको हो ।
घटनास्थलमा सुरक्षाकर्मी, सशस्त्र प्रहरी बल, स्थानीयसँगै गोताखोर परिचालित भएकोे इप्रका शिशुवाका प्रहरी निरीक्षक रावतले जानरकारी दिए । बेपत्ताको खोजी तीव्र पारिएको प्रहरीले जनाएकोछ ।
प्रतिक्रिया