अमेरिका । अमेरिकाको क्यालिफोर्निया राज्यको सान फ्रान्सिस्को बस्दै आएकी नेपाली मूलकी २९ वर्षीया मनसुन पाण्डेको निधन भएको छ । 

 

उनी सान फ्रान्सिस्कोमा लामो समयदेखि बस्दै आएका पत्रकार, सामाजिक अभियन्ता, पूर्वपर्यटन दूत, कलाकार अनिल पाण्डे तथा रिना पाण्डेकी एकमात्र सुपुत्री हुन् । उनको निधन गत बिहीबार जुन २३, २०२२ का दिन क्यालिफोर्निया राज्यको स्थानीय समयअनुसार साँझ ६ बजेतिर भएको हो ।

 

स्व मनसुनले सूचना प्रविधि  विषय अध्ययन गरेकी थिइन् भने उनले विश्वकै चर्चित एप्पलमा समेत काम गरेकी थिइन् । तर, केही समय अगाडि उनले काम पनि छोडेकी थिइन् ।

 

उनी केही समय अगाडि युरोप यात्रामा समेत गएर अमेरिका फर्केकी थिइन् । पिता स्वयं कलाकार र क्यालिफोर्नियाको बे एरिया अत्यन्तै क्रियाशील भएको कारण सुपुत्री पनि बाबुलाई साथ दिँदै विभिन्न कार्यक्रममा सहभागी हुँदै आएकी थिइन् । 

 

पिता अनिल पाण्डेले नेपालको पर्यटनलाई प्रवर्द्धन गर्न सन् २०११ मा आयोजना गरेको नेपाल दिवसमा समेत मनसुनले सक्रिय रुपमा भाग लिएकी थिइन् । उनका थुप्रै भिडियो पिताले सुरक्षित राखेका छन् ।

 

यस दुखद घडीमा हिमालय खबर हार्दिक समवेदना प्रकट गर्दछ । नेपाल अमेरिका पत्रकार संघ (नेजा)का अध्यक्ष विकाशराज न्यौपानेले पत्रकार तथा कलाकार अनिल पाण्डे तथा रिना पाण्डेका सुपुत्री मनसुनको दिवंगत आत्माको चिरशान्तिको कामना गर्दै शोकसम्तप्त परिवारजनमा हार्दिक समवेदना प्रकट गरेका छन् ।