कोलोराडो, अमेरिका ।  कोलोराडो निवासी नेपालीहरुले गायक किरण गजमेरलगायत स्थानीय कलाकारहरुको उपस्थितिमा सांस्कृतिक साँझ कार्यक्रमको आयोजना गरी नयाँ वर्ष २०७९ को शुभकामना आदान प्रदान गरेका छन् ।

 

नेपालीहरुको साझा संस्था रकी माउन्टेन फ्रेन्डस् अफ नेपालले आयोजना गरेको शुभकामना साँझमा सहभागी भई उनीहरुले एकआपसमा शुभकामना आदानप्रदान गरेका हुन् । कार्यक्रममा कोलोराडोमा बसोवास गर्ने नेपाली तथा नेपाली भाषी भुटनिज, स्थानीय विभिन्न संघसंस्थाका प्रतिनिधि, पत्रकार तथा व्यवसायीहरुको बाक्लो उपस्थिति रहेको थियो ।

 

ब्रुमफिलस्थित लिगेसीहाई स्कुलमा शनिबार साँझ सम्पन्न भएको कार्यक्रममा सहभागी कतिपय नेपालीहरु दौरासुरुवाल, ढाका टोपी, गुन्यूचोलो लगाएर आएका थिए भने केही आफ्नो जातीय भेषभूषा झल्कने पहिरहन लगाएर आएका थिए ।

 

कार्यक्रम आयोजनास्थलमा बालक हुन् वा वृद्ध, युवा हुन् वा युवती सबै आआफ्ना दौँतरीका साथ शुभकामना साँटासाट गरिरहेका थिए । कोही हात मिलाएर त कोही हग गरेर, कोही नमस्ते गरेर त कोही टाउको निहुँराएर, उमेर र अवस्थाअनुसार नयाँ वर्षको शुभकामाना साँटासाट गर्ने प्रक्रिया निरन्तर चलिरहेको देखिन्थ्यो ।

 

संस्थाका निवर्तमान अध्यक्ष विनोद त्रिपाठीले पानसमा बत्ती बालेर उद्घाटन गरेपछि कार्यक्रममा उपस्थित सबैलाई स्वागत गर्दै कार्यक्रमको उद्देश्यबारे प्रष्ट पारेका थिए ।

 

स्थानीय कलाकार भाइबहिनीहरुले लोक, आधुनिक, देशभक्तिलगायतका गीतमा कम्मर मर्काइ मर्काइ नेपाली शैलीमा नाचेको हेरिरहँदा जोकोहीलाई नेपाली घरआँगनमै भएको महसुस गराएको थियो । 

 

कार्यक्रममा गायक किरण गजमेरले लाइभ व्याण्डमा दर्जन बढी गीत गाएका थिए । त्यसैगरी उनले लाइभ व्याण्डमै चर्चित गायिका सम्झना पाण्डेसँग पनि गीत गाएर दर्शक तथा श्रोताहरुको मन जित्न सफल भएका थिए । लाइभ व्याण्डमा उनीहरुलाई विजय नेपाली अधिकारी, वीरेन्द्र सुवाल सिंह, प्रयास रसाइली, अनुपम राई, राजेश खड्की, हरिश गजमेरलगायतका कलाकारहरुले साथ दिएका थिए ।  

 

त्यसैगरी सोही कार्यक्रममा शशि रावल र भुवन श्रेष्ठले पनि गीत गाएका थिए । शुभकामना साँझमा विभिन्न चर्चित लोक तथा राष्ट्रभक्तिका गीतहरुमा साना भाइबहिनीहरुले सुन्दर नृत्य प्रस्तुत गरी श्रोता तथा दर्शकहरुको मन जित्न सफल भएका थिए ।

 

संस्थाका उपाध्यक्ष रामगोपाल श्रेष्ठको सभापतित्वमा सम्पन्न कार्यक्रम संस्थाका महासचिव अर्जुन बगाले र कल्चर सेक्रेटरी आकृति राई अधिकारीले संयुक्तरुपमा सञ्चालन गरेका थिए ।

 

कार्यक्रम सफल बनाउन विभिन्न दाताहरुले आर्थिक सहयोग उपलब्ध गराएका थिए । प्राप्त सहयोगको आधारमा डाइमन्ड, गोल्ड र सिल्भरमा वर्गीकरण गर्दै उनीहरुलाई प्रशंसापत्र प्रदान गरिएको थियो ।  

 

कार्यक्रममा ओम बड्स कमिटीका सदस्य रोहिणी शर्मा र निवर्तमान अध्यक्ष विनोद त्रिपाठीबाट संयुक्तरुपमा  कलाकार तथा सहयोगी दाताहरुलाई खादा लगाई प्रशंसापत्र प्रदान गरिएको थियो । संस्थाले आफ्नो स्थापनाकालदेखि निरन्तररुपमा यस्ता सांस्कृतिक कार्यक्रमको आयोजना गर्दै आइरहेको छ ।

 

त्यसैगरी कोलोराडोमा नयाँ वर्षको अवसर पारेर बोल्डरस्थित सि–यू मा अध्ययनरत नेपाली छात्रछात्राहरुको संगठन नेप्लिज स्टुडेन्ट एसोसिएसनको आयोजनामा नेपाल नाइटको कार्यक्रम सम्पन्न भएको छ । उक्त कार्यक्रममा गायक दिवश गुरुङ, गायिका वार्तिका राईको प्रस्तुति रहेको थियो ।