किभ । रूसी सशस्त्र फौजले युक्रेनविरुद्ध युद्ध सुरु गरेदेखि ४०४ रूसी ट्याङ्कर ध्वस्त गरेको र १३ हजार ५०० भन्दा बढी रूसी सेनाको मृत्यु भएको युक्रेनको विदेश मन्त्रालयले मंगलबार जानकारी गराएको छ । 

 

रूसले यस सम्बन्धमा युक्रेनी भनाइको खण्डन गर्दै युद्धमा धेरै रूसी सेनाको मृत्यु भएको समाचार सम्प्रेषण गरेर आफ्ना नागरिकलाई सान्त्वना दिनका लागि उक्त दाबी गरेको तर युक्रेनले भनेजति सङ्ख्यामा रूसी सुरक्षाकर्मीको मृत्यु नभएको बताएको छ । 

 

युक्रेनी परराष्ट्र मन्त्रालयको तथ्याङ्कअनुसार युद्धका क्रममा विभिन्न प्रकारका एक हजार २७९ रूसी हातहतियार, लडाकू विमान, ९५ हेलिकोप्टर, १५० तोपका टुक्रा र ६४ एमएलआर, ३६ एन्टि–एअरक्राफ्ट, ६४० गाडी र ६० भवनहरूलगायतका बन्दोबस्तीका समान ध्वस्त भएका छन् । 

 

मस्कोले युक्रेनबाट स्वतन्त्र भएको घोषणा गर्दै आएका डोनेट्स्क र लुहान्स्कलाई स्वतन्त्र गणतन्त्रको रूपमा मान्यता दिएको तीन दिनपछि सैन्य कारबाही थालेको मंगलबार २० दिन पुगेको छ । 

 

यसैबीच, युक्रेनी राजधानी किभमा रूसी सेना प्रवेश गरेपछि युद्धमा सर्वसाधारणको मृत्यु नहोस् भनी सहरी क्षेत्रमा लगाइएको निषेधाज्ञा आदेशलाई मार्च १७ सम्मका लागि थप गरेको छ । एजेन्सी