नेपाल

पत्रकार एलबी विश्वकर्माको निधनको घटनामा महासंघले अध्ययन गर्ने

प्रकाशित |
काठमाडौँ । नेपाल पत्रकार महासंघका अध्यक्ष विपुल पोख्रेलले पत्रकार एलबी विश्वकर्माको निधन भएको घटनाका बारेमा महासंघले अध्ययन गर्ने बताएका छन् । 
 
 ‘काठमाडौँको एक टेलिभिजनमा कार्यरत युवा पत्रकार विश्वकर्माको उपचारको क्रममा मृत्यु भएको छ । सहज उपचारको अभावमा उनको मृत्यु भएको भन्ने प्रारम्भिक जानकारी प्राप्त भएको छ’ अध्यक्ष पोख्रेलले भने, ‘स्वास्थ्य संस्थामा सहज उपचारको प्रबन्ध नहुनु र बिरामीसँग उपचार रकमको अभाव हुँदा परीक्षण समेत नहुनु दुःखद र गम्भीर विषय हो ।’
 
संञ्चार संस्थामा कार्यरत पत्रकार बिरामी पर्दा उसको उपचारको जिम्मा सम्बन्धित सञ्चारसंस्थाले लिनुपर्नेमा त्यसो भएको पनि नदेखिएकाले अध्ययन गर्न आवश्यक भएको पोख्रेलले जिकिर गरे । ‘यो अध्ययनले एउटा श्रमजीवी पत्रकारको समस्या र राज्यको कमजोर स्वास्थ्य सेवाको अवस्था चित्रण हुने छ’ पोख्रेलले भने । 
 
मृतक पत्रकार विश्वकर्माले आफूले काम गरेका सञ्चारसंस्थाहरूबाट आफ्नो तलब सुविधासमेत नपाएको बुझिएको छ । ‘यो विषयलाई महासंघले गम्भीरतापूर्वक लिएको छ’ पोख्रेलले भने,  ‘उपचारको समयमा समेत पारिश्रमिक उपलब्ध नगराउने संस्थाहरुका बारेमा पनि हामीले अब एउटा धारणा बनाएर अगाडि बढ्न पर्ने भएको छ ।’ उनले पारिश्रमिक नदिने संस्थाले उन्मुक्ति नपाउनेसमेत बताए ।
 
‘फ्रन्टलाइनर पत्रकारको उपचारको सवालमा गम्भीर बन्न राज्यलाई दबाब नै दिनुपर्ने अवस्था देखियो’ भन्दै पोख्रेलले कोरोना संक्रमण देखिएका पत्रकारहरुको उपचारको प्रबन्ध मिलाउन महासंघका सबै संरचनाहरुलाई तयारी अवस्थामा राखिएको जानकारी पनि दिए ।  
 

हिमालय खबर

हिमालय खबर -

थप »

यो खबर पढेर तपाईलाई कस्तो महसुस भयो ?

प्रतिक्रिया