खेलकुद

नेपाल महिला क्रिकेट टोली आठ विकेटले विजयी

प्रकाशित |
काठमाडौँ ।  दुवईमा जारी आइसिसी टी–ट्वान्टी वुमेन एसिया रिजनल क्वालिफायर प्रतियोगितामा नेपाली महिला क्रिकेट टोली विजयी भएको छ ।
 
नेपालले दोस्रो खेलमा भुटानलाई आठ विकेटले पराजित गरेको हो । दुवईमा सम्पन्न खेलमा भुटानले टस जितेर ब्याटिङ गरेको थियो । निर्धारित २० ओभरको खेलमा भुटानले ६ विकेट गुमाउँदै ६१ रन बनाएको थियो । भुटानका लागि नगावाङ छोदेनले सर्वाधिक १३ रन बनाइन् । त्यस्तै, सोनाम पाल्देनले ११, यासी छोदेनले ९ रन बनाए पनि अन्य भुटानी महिलाहरुले उल्लेखनीय प्रदर्शन गर्न सकेनन् ।
 
नेपालका लागि सीता रानामगरले ४ ओभरमा १० रन खर्चंदै भुटानको ३ विकेट लिन सफल भएकी थिइन् । करूणा भण्डारीले ४ ओभरमा ६ रन दिँदै १ विकेट लिएकी थिइन् । ६२ रन विजय लक्ष्यसहित मैदानमा उत्रेको नेपाली महिला क्रिकेट टोलीले आठ ओभर तीन बलमा २ विकेट गुमाएर निर्धारित लक्ष्य पूरा गरेको थियो ।  
 
नेपालको जितमा सीता रानामगरले १३ बल खेल्दै २ चौकाको मद्दतमा १७ रन बनाएर क्याचआउट हुन पुगेकी थिइन् । कप्तान रूविना क्षेत्री व्यक्तिगत १० रनमा रनआउट भएकी थिइन् । इन्दु बर्मा नटआउट १८ रन र कविता जोशीले २ बलमा २ चौका प्रहार गरी ८ रन बनाएकी थिइन् । भुटानका लगि टासी छेकीले १ विकेट लिन सफल भइन् । अन्य बलरहरुले कुनै विकेट लिन सकेनन् । 
 
४ ओभरमा १० रन खर्चंदै ३ विकेट र १७ रन बनाएकी सीता रानामगर प्लेयर अफ दी म्याच धोषणा भएकी थिइन् । टप दुईमा रहने महिला क्रिकेट टोली आइसिसी टी–ट्वान्टीको क्वालिफायर खेल्नेछ । नेपाल आफ्नो पहिलो खेलमा दुवईसँग ६ विकेटले पराजित भएको थियो ।

हिमालयखबर संवाददाता

हिमालयखबर संवाददाता -

थप »

यो खबर पढेर तपाईलाई कस्तो महसुस भयो ?

प्रतिक्रिया