चितवन । नेपाली सेनाको द फेमस महेन्द्र दल, शिवपुरीमा हुद्दा पदमा कार्यरत धादिङको निलकण्ठ नगरपालिका–१३ बस्ने ३६ वर्षीय भरत गुरूङको हत्या आरोपमा उनकै साथी सिपाही गंगाधर ढकाल पक्राउ परेका छन् ।
ढकालले चितवनको भरतपुर महानगरपालिका–१७ स्थित सिमलडाँडामा ९ लाख रुपैयाँका लागि गुरूङको हत्या गरेको प्रहरीको प्रारम्भिक अनुसन्धानबाट खुलेको छ । जिल्ला प्रहरी कार्यालय चितवनले शुक्रबार पत्रकार सम्मेलन गरी सो हत्या प्रकरणबारे जानकारी दिएको हो ।
भरतपुर महानगरपालिका–१७ सिमलडाँडास्थित घोलमा बिहीबार गुरुङको शव फेला परेको थियो । गुरुङको टाउकोमा गोली लागेको अवस्थामा स्थानीयले शव देखेपछि प्रहरीलाई खबर गरेका थिए ।
प्रहरीले घटनास्थलमा गोलीको खोकासमेत भेटिएको थियो । ढकाललाई प्रहरीले बिहीबार रतपुर–२० चनौलीबाट पक्राउ गरेको हो । प्रहरीले झाडीमा फालेको एसएमजी हतियार एक थान, एक थान गोलीको खोका, नगद आठ लाख रूपैयाँसहित घटनामा प्रयोग भएका सामग्री बरामद गरेको पत्रकार सम्मेलन गरी जनाएको छ ।
जिल्ला प्रहरी कार्यालयका प्रहरी उपरीक्षक (एसपी) ओमप्रसाद अधिकारीका अनुसार हुद्दा गुरुङ गत पुसमा शान्ति सेनाको मिसनमा गई लेवनानबाट फर्किएका थिए । शान्तिसेनामा जाँदा कमाएको रकमबाट उनले चितवनमा जग्गाको बैना गरेको बताइएको छ । उनले ग्लोबल आइएमई बैंकमा रहेको आफ्नो खाताको चेक मिल्ने साथी ढकाल दिएका थिए ।
तर, ढकालले साउन ३ गते भरतको हस्ताक्षरसमेत आफैँले गरी बैंकबाट ९ लाख रुपैयाँ निकालेको पाइएको छ । जसमध्ये एक लाख रुपैयाँ आफैँसँग राराखी बाँकी ८ लाख रुपैयाँमध्ये ६ लाख आफ्नो श्रीमतीलाई ६ लाख र बाँकी दुई लाख आफ्नो बुबालाई दिए ।
साउन ५ गते मृतक गुरुङले जग्गा पास गर्न आफू चितवन आउनुपर्ने बताएपछि ढकाल मोटरसाइकल लिएर काठमाडौँबाट गुरुङलाई चितवन ल्याएपछि उनीहरु होटलमै बास बस्छन् ।
चितवनका प्रहरी प्रमुख एसपी अधिकारीका अनुसार ६ गते भरतका माइलो बुबाका छोरा रविनको भरतपुर–१९ शारदानगरस्थित घरमा पुग्छन् ।
त्यही दिन बजार घुमाउन लगेका ढकालले गुरुङलाई अत्याधिक मादक पदार्थ खुवाई रातभर मोटरसाइकलमा घुमाएर असार ७ गते बिहान ५ बजेतिर सिमलडाँडानजिकै पुगेपछि गोली हानेर हत्या गरेको प्रहरीको अनुसन्धानमा खुलेको छ ।
सुरुमा पिसाब लाग्यो भनी मोटरसाइकल रोकेका ढकालले मोटरसाइकलको पछाडि बसिरहेका गुरुङलाई दायाँ कान नजिकबाट गोली प्रहार गरे । उनी भुइँमा लडेपछि ७ मिटरको दूरीमा रहेको कुलोमा फालेर ढकाल घटनास्थलबाट फरार भए ।
उनले घटनामा प्रयोग भएको हतियार भरतपुर–८ स्थित गरुवास्थित झाडीमा फालेर आफू पूर्वी चितवनको सौराहाचोकस्थित फुपूको घरमा पुगेका थिए । प्रहरीले शुक्रबार अनुसन्धानका लागि उनको फुपूको घर पुगेको थियो ।
प्रहरकिा अनुसार सिपाही ढकाललाई मुलुकी अपराधसंहिता–२०७४ को परिच्छेद १२ ज्यानसम्बन्धी कसूरअन्तर्गत दफा १७७ बमोजिम जन्मकैदको सजायको माग गरिएको छ ।
प्रतिक्रिया