काठमाडौँ । नेपालमा शनिबार थप ८१६७ जनामा कोरोना भाइरस संक्रमण पुष्टि भएको छ । गत चौबीसघन्टामा १७ हजार ९७१ जनाको पिसिआर र ५७७ जनाको एन्टिजेन परीक्षणका क्रममा ८०४६ र २११ जना गरी ८१६७ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । 

 

यस्तै, नेपालमा थप १८७ जनाको निधन भएको मन्त्रालयले जनाएको छ । नेपालमा पछिल्लो समय दोस्रो भेरियन्टको कोरोना संक्रमण व्यापक भएसँगै मृत्यु हुनेको संख्या पनि निरन्तर बढ्दो क्रममा रहेको छ ।  

 

यसैगरी, पछिल्लो चौबीसघन्टामा ५४५५ जना संक्रमणमुक्त भएका छन् । योसहित हालसम्म ७४.४० प्रतिशत अर्थात् ३ लाख ३३ हजार १०८ जना संक्रमणमुक्त रहेको मन्त्रालयले जनाएको छ । 

 

शनिबारसम्म देशभर एक लाख ९ हजार ७४० जना सक्रिय संक्रमित रहेका छन् । संक्रमितको संख्या चार लाख ४७ हजार ७०४ जना पुगेको छ । 

 

तीमध्ये होम आइसोलेसनमा १ लाख १ हजार ७७१ र ७ हजार ९६९ जना संस्थागत आइसोलेसनमा रहेका छन् । संस्थागत आइसोलेसनमा रहेकामध्ये १ हजार ३३१ जनाको आइसियूमा र ३७० जना भेन्टिलेटरमा उपचाररत रहेका छन् । मन्त्रालयले दिएको जानकारीअनुसार देशभरका क्वारेन्टाइनमा ६७५ जना रहेका छन् ।