टेक्सस (अमेरिका) । उत्तरी अमेरिका (अमेरिका र क्यानाडा) मा रहेका नेपालीहरुको सबैभन्दा पुरानो संस्था एसोसिएसन अफ नेपलिज इन द अमेरिकाज् (एएनए)ले अमेरिका-नेपालको कूटनीतिक सम्बन्धको ७५ वर्ष प्रवेश गरेको अवसर पारेर अप्रिल २५ तारिक साँझ विशेष कार्यक्रम गर्ने भएको छ । 

 

टेक्ससको स्थानीय समयअनुसार साँझ ६ बजे (पूर्वी समयअनुसार साँझ ७ र प्यासिफिक समयअनुसार अपरान्ह ४ बजे) नेपाल अमेरिका कूटनीतिक सम्बन्धका ७५ वर्ष र हाम्रा उपलब्धि विषयमा विशेष कार्यक्रम हुन लागेको एएनएका अध्यक्ष विजयराज भट्टराईले प्रेस विज्ञप्तिमार्फत जानकारी दिएका छन् । 

 

कार्यक्रम नेपालका परराष्ट्रमन्त्री प्रदीप ज्ञवालीको प्रमुख आतिथ्यतामा हुन लागेको हो । सो अवसरमा अमेरिकाका लागि नेपाली राजदूत डा. युवराज खतिवडा, नेपालका लागि पूर्वअमेरिकी राजदूत स्कट डेलिसीलगायतको सहभागिता रहनेसमेत जनाइएको छ ।  

 

त्यस अवसरमा अमेरिका तथा नेपाल दुवै पक्षका व्यक्तित्वहरुसँग विशेष अन्तरक्रिया कार्यक्रमको आयोजना हुने एएनएका महासचिव डा. चूडामणि खनालले बताए । 

 

कार्यक्रममा अमेरिका(नेपाल सम्बन्धमा विशेष जानकारी राख्ने व्यक्तित्वहरु डा. जीत जोशी,  डा. अनिल सिग्देल, डा. विद्या रञ्‍जित र डेभिड कप्रारा प्यानालिष्ट रहेका छन् । कार्यक्रमको सञ्चालन एएनए बोर्ड अफ ट्रष्टी डा. अम्बिकाप्रसाद अधिकारीबाट हुनेछ । भर्चुअल प्रविधिमार्फत आयोजित यस प्रकारको यो निकै ठूलो कार्यक्रम रहेकोसमेत भट्टराईले बताए । 

अमेरिका नेपालको कूटनीतिक सम्बन्ध सन् १९४७ को अप्रिल २५ मा भएको थियो । अमेरिका बेलायतपछि नेपालको कूटनीतिक सम्बन्ध स्थापित भएको दोस्रो मुलुक हो ।  

 

नेपालले सन् १९५८ मा वासिङ्गटन डि.सी.मा आफ्नो दूतावासको स्थापना गरेको थियो भने अमेरिकाले सन् १९५९ मा काठमाडौँमा आफ्नो दूतावास स्थापना गरेको थियो।