काठमाडौँ । सरकारले नेकपा नेत्रविक्रम चन्द विप्लव समूहमाथि लगाएको प्रतिबन्ध फुकुवा गर्ने निर्णय गरेको छ । 

 

बिहीबार बसेको मन्त्रिपरिषद् बैठकले सरकारी वार्ता टोली र विप्लव समूहबीच भएको तीनबुँदे सहमति अनुमोदनसमेत गरेको छ ।

 

 

हिंसा छाडेर शान्तिपूर्ण राजनीतिमा आउने प्रतिबद्धता व्यक्त गरेकाले प्रतिबन्ध फुकुवा गर्ने निर्णय भएको कृषि मन्त्री पद्मा अर्यालले जानकारी दिइन् । उनका अनुसार सरकारले दुवै वार्ता टोलीबीच भएको सहमति पनि अनुमोदन गर्ने निर्णय गरेको छ ।  

 

 

सरकारले नेत्रविक्रम चन्द ‘विप्लव’ नेतृत्वको समूहका सबै कैदीबन्दी रिहा गर्ने भएको छ ।

 

सरकार र विप्लव समूहबीच भएको तीनबुँदे सहमतिमा विप्लव समूहका सम्पूर्ण बन्दी रिहा गर्ने र मुद्दा खारेजीलगायका विषय अघि बढाउने उल्लेख छ ।

 

सो समूहका १३४ जना नेता–कार्यकर्ता जेलमा छन् । यही फागुन ९ गतेसम्म सो समूहका दुई हजार ८६ जना पक्राउ परेका छन् । जसमध्ये एक हजार ८४४ जना मुद्दा दर्तापछि छुटेका छन् भने १३४ जना पुर्पक्षका लागि कारागार चलान भएका छन् ।

 

प्रहरी प्रधान कार्यालयका अनुसार १८ जनाको मुद्दा अनुसन्धानको क्रममा छ । सरकारले ०७५ फागुन २८ गते सो समूहमाथि प्रतिबन्धको घोषणा गरेको थियो ।