मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

ग्लोबल   

इरानका सर्वोच्च नेता खामेनीलाई शब्द चयनमा होसियारी रहन ट्रम्पको चेतावनी

इरानका सर्वोच्च नेता खामेनीलाई शब्द चयनमा होसियारी रहन ट्रम्पको चेतावनी


वासिङ्टन । राष्ट्रपति डोनाल्ड ट्रम्पले इरानका सर्वोच्च नेता अयातोल्ला अली खामेनीलाई ‘उनका शब्दहरूप्रति होसियार बन्न’ चेतावनी दिएका छन् । 
 
“पछिल्लो समय साख गुमाइसकेका इरानका तथाकथित ‘सर्वोच्च नेता’ले यूरोप र अमेरिकाबारे ‘नीच शब्दहरू’ बोलेका छन्,” शुक्रबार खामेनीद्वारा प्रार्थनासभामा सम्वोधनका क्रममा प्रयोग गरेका शब्दहरूप्रति चासो व्यक्त गर्दै अमेरिकी राष्ट्रपतिले सामाजिक सञ्जाल ट्वीटरमा आक्रोश पोखेका हुन् । 
 
ट्रम्पले भनेका छन्, “खामेनीको सम्बोधनमा प्रयोग भएको भाषा उत्तेजित थियो । खामेनीले बेलायत, फ्रान्स र जर्मनीलाई ‘अमेरिकाको सेवक’ भनेर गम्भीर गल्ती गरेका छन् ।” 
 
ट्रम्पको ट्वीट सन्देशमा भनिएको छ, “इरानको अर्थतन्त्र धराशायी भएको छ र त्यहाँका नागरिक पीडित छन् । नेतृत्वमा रहेका नेताले आफ्नो शब्द प्रयोगमा होसियारी नअपनाएमा यसको नतिजा उनीहरू आफैँले भोग्नुपर्नेछ ।”
 
शुक्रबार तेहरानको प्रसिद्ध मोसाला मस्जिदमा प्रार्थनासभामा सन् २०१२ पछि पहिलोपटक सम्बोधन गर्दै इरानविरोधी शक्तिले दुर्घटनालाई इस्लामिक गणराज्यको विरूद्धमा प्रचारप्रसार गर्न लागिपरेका बताएका थिए । 
 
प्रवचनमा इरानी नागरिकलाई राष्ट्रियताको रक्षाका लागि एकजुट हुन आग्रह गर्दै अमेरिकालगायत यूरोपेली केही मुलुकको नाम लिएरै आलोचना गरेका थिए । 
 
सर्वोच्च नेता खामेनीले तेहरानमा गरेको सम्बोधनमा विमान खसालिनु तीतो यथार्थ भएको र यसले हरेक इरानी नागरिकको मन जलेको बताउँदै तर यसैको आवरणमा केही शक्तिले इरानी विशेष बलका मेजर जनरल कासिम सुलेमानीको शहादत र बलिदानलाई बिर्साउने गरी घटनालाई अतिप्रचारमा ल्याएका भन्दै यसमा सबै इरानीले सचेत बन्नुपर्नेमा जोड दिएका थिए ।